Pawl 10 leh 12 exam tir tum a ni Pawl dangte kàitir dan ngaihtuah dawn
School Education minister Lalchhandama Ralte chuan, pawl 10 leh 12 zirlaite tana MBSE-in exam a buatsaih ṭhin chu kalpui ngei tum a nih thu a sawi a, "Class dangte pawh exam buatsaih a nih loh pawhin, a páwng a taka promote ngawt tum a ni lo," a ti a; pawl dangte kal dan tur hi ngaihtuah tur a nih thu a sawi.
Vanglaini palai zawhna chhangin Lalchhandama Ralte chuan, pawl 10 leh 12 zirlaite chu dan pangngai angin exam tir tura inbuatsaih a nih thu a sawi a, "Anni hi chu exam tir ngei a ngai. An exam hun tur erawh kum dang aia tihtlai deuh a ni dawn. Ṭum dangah chuan February thla tàwp lam aṭangin March thla tìr lam thleng an exam a, tun ṭumah chuan March tàwp lam aṭanga April tìr lam thleng exam tir tum a ni," tiin, exam hun tur tak tihfel a la nih loh thu a sawi.
Board exam ni lo (pawl 10 leh 12 ni lo)-te pawh online leh offline hmanga zirtir reng an nih thu sawiin Minister chuan, "Thingtlang hmun ṭhenkhat online hmanga class kal rem lohnaahte pawh zirtirtute'n naupangte zir tur print chhuakin zirlaite an sem a ni. Board ni lote hi exam buatsaih theih a nih loh pawhin, a páwng a taka páwl sawntir ngawt ṭha kan ti lo a, test-te buatsaih reng a ni. Chu'ng aṭangte leh an dinhmun uluk zawka thlirin thutlukna siam a ni ang," a ti.
Lalchhandama Ralte chuan, zirlaite'n kum khat chhunga an thiam ngei ngei tura mithiamte'n an ngaih chu thiamtir ngei tuma hmalak reng a nih thu sawiin, "Online hmanga zirna dawng thei lote pawhin an dawn ngei theih nan April 2020 aṭang khan LPS, Zonet leh DDK-ahte zirtirna kalpui reng a ni a, keini lam chuan theihtawp kan chhuah," a ti a; ti ṭha ve viauin inngai mah se, mipui duhkhawp erawh a nih loh theih thu a sawi.
School Education Minister sawi danin, zirlaite Covid-19 vanga zirna lama an hnufûm lutuk lohna turin kum 2020-21 academic session March 2021-a tàwp tur chu April 2021 thleng pawhsei a ni.
Academic session pawhsei a nih hian, nakkumah hripui léng dinhmunin ziaawm lam a pan chuan zirna hun ṭha leh tam zawk an nei thei ang. Session pawhsei ni mah se, central lama session nena insu buai lo turin ruahmanna siam tum a ni.
Kuminah sikul kal chhunzawm a nih dawn leh dawn loh te, board exam hun turte leh board ni lote kalpui zel dan turte chu November 27, 2020-ah Education Minister hoin School Education hnuaia secretariat, directorate, SCERT leh MBSE hotute'n an ngaihtuah dawn.
Lalchhandama Ralte chuan, Covid-19 lockdown kalpui ni ṭhin mah se, zirna-in hma a sawn theih nan theihtawp an chhuah thu a sawi a, "District thar pathum Saitual, Khawzawl leh Hnahthialahte district education officer leh district project coordinator dah vek a ni tawh," a ti.