COVID-19: Mizoram dinhmun Hripui vei 32 hmuh belh a ni

November 18, Nilaini khan Mizoramah Covid-19 vei mi 32 hmuh chhuah a ni a, Mizoram chhunga kái (local positive contact) mi 14 leh state páwn aṭanga rawn lut thar mi 18 an ni. Nimin khan hripui laka fihlim tawh mi pali chhuahtir an ni thung.

Covid-19 positive hmuh chhuah tharte chu mipa 26 leh hmeichhia paruk an ni a; ZMC labo­ratory-a hmuh mi pahnih, TrueNAT-PCR hmanga hmuh mi 18 leh Rapid Antigen Test (RAT) hmanga hmuh mi 12 an ni.

Nimin khan hripui laka fihlim tawh mi pali chu enkawlna hmun aṭangin chhuahtir an ni a; SRH-ZMC aṭangin mi pakhat, Champhai CCC aṭangin pakhat, Lawngtlai CCC aṭangin pahnih an chhuak. Nilainia chhuahtir zingah nimina Vanglainia tarlan hman loh mi 37 an awm a, Nilainia chhuak zawng zawng chu mi 49 an ni.

Mizoramah Covid-19 positive mi 3,513 hmuh chhuah a ni tawh a, mipa 2,612 leh hmeichhia 901 an ni. Nimin tlai dar 5 thleng khan mi 3,025 (86.11%) chhuahtir an ni tawh a, mi panga (0.14%) thi tawhin, enkawl mek mi 483 (13.75%) an awm.

Mizorama hripui vei hmuh tawhte zinga mi 1,609 chu Mizoram chhunga kái an ni a, mi 1,904 chu state páwn aṭanga rawn lut an ni. State páwn aṭanga rawn lut zingah hian tun hnaia Bihar Assembly inthlanpuia venhimna hna thawka kal Mizoram police rawn haw zinga mi 77 an tel. 

November 18, Nilaini khan Mizoramah swab sample 1,397 endik a ni a, chu'ng aṭang chuan Covid-19 vei mi 32 an hmu chhuak. Swab sample endik dan chu - ZMC laboratory-ah mi 436, TrueNAT-PCR hmangin district pasarihah mi 118 leh RAT hmangin district 10-ah mi 843 an ni.

Sorkar thuchhuah tarlan danin, ZMC laboratory-ah RT-PCR hmangin Covid-19 vei mi pahnih chiah hmuh chhuah a ni a, Kulikawn (Ngaizel)-a mipa kum 37 leh Chanmari-a hmeichhia kum 39-te niin, Mizoram chhunga kái ve ve an ni.

TrueNAT-PCR hmangin district pali - Kolasib, Serchhip, Lawngtlai leh Saitual damdawi-inahte hripui vei mi 18 hmuh chhuah an ni a; an zinga a tam zawk, mi 16 chu Bihar Assembly inthlana security duty-a kal rawn hawte an ni. Mi pahnih dang pawh state páwn aṭanga rawn lut an ni bawk.

RAT hmangin hripui vei mi 12 hmuh chhuah a ni a, Aizawlah mi panga leh Lawngtlaiah mi pasarih hmuh niin, an vaiin tualchhunga kái vek an ni.