Inthlan dawn vanga police ngenna angin Police hnenah silai 10,337 tun a ni tawh

November 28, 2018-a Assembly inthlanpui neih a nih dawn vanga Mizoram Police-te'n ngenna angin Mizoram hmun hrang hrangah November 9, 2018 thleng khan police station leh oust post hrang hrangah silai 10,337 tun a ni tawh.

Inthlan atana Mizoram Police hmalak dan puangtu IGP LH Shanliana chuan silai 10,337 tun a nih tawh thu sawiin, "Silai tun tawh zat hi Mizorama silai register zawng zawng aṭangin 76% a ni tawh. Inthlanna felfai leh muanawm a awm theihna atan thil pawimawh em em chu silai khuakhirh hi a ni. Kan lo leh thlaite ven ngawrh hun lai tak a ni chungin, silai neitute'n silai tung tura ngenna silai neitute'n an zâwm a, an tung ruih ruih a ni. Hei hian dan pawisa hnam kan nihna a tilang," a ti.

LH Shanliana chuan, silai la tung lote chu tung zel tura an beisei thu sawiin, "Silaite hi a neitute'n an roh em em tih kan hria a, a dahna tur kan siam thlap. Silai neitute'n an silai hi police station leh outpost-ah duh duh hunah enin, an tifai thei reng a ni," a ti a; silai tung tura hmalaknaah mipui leh local council/village council ṭawiawmnaah Mizoram Police-te an lawm hle tih a sawi.

DIG chuan, police-te chu danin a phût anga thil ṭha lo veng reng an nih thu sawiin, "Inthlan puan a nih aṭangin Model Code of Conduct puan nghal a ni a, thil ṭha lo leh sorkar phal lohte khuahkhirh turin flying squad-te dinin, district tinah check gate-te siam a ni a, ngawrh taka hnathawh nghal a ni. Zu, drug leh pawisa lem tam tham tak man nghal a ni a, a mawhphutute chu thubuai siamsak an ni. Dan leh thupek kenkawh kawngah police-te ṭawiawm zel turin mipui kan sáwm a ni," a ti.

Danin a phût ang leh Election Commi­ssion of India-in a phût angte zûlzuiin inpuahchahna leh hmalakna tur buatsaih a nih thu sawiin LH Shanliana chuan, "DGP aṭanga a hnuai lam zawng zawng hi inthlan atana duty tura ruat kan ni. Inthlan atana notification chhuah aṭangin ngawrh leh zuala venhima lam kalpui a ni," a ti a; an hmalakna mipuite'n an dawnsawn dan aṭangin Mizo mipuite'n dan an ngaih pawimawhzia a lang chiang tih a sawi.

LH Shanliana chuan, ṭhenawm state nena ramri leh international border aṭanga inthlanna tibuai thei thil a luh lohna atan ṭhenawm state DGP-te hma la tura ngenna an thawn vek thu a sawi a, "Ramri hnaiah SP leh OC-te pawh a khát tâwkin Mizoram Police lamin an hrilh reng a. Border area-a police outpost - Vairengte, Saiphai, Zawlnuam leh Bairabi-ahte CCTV dah vek a ni a, uluk taka vil reng a ni," a ti.

DIG chuan, Mizorama polling station 1,764 zinga eng emaw zat chu critical polling station-a puan a nih thu sawiin, "Heng polling station-ahte hian venhimna uluk zawka kalpui a ni," a ti a; critical polling station-a puante chu kum 2013 MLA inthlan vote tlak ṭhatna leh ramri hrula mite deuh vek a nih thu a sawi.