Pawngsualtu kum 18 táng turin hrem

Champhai District Special Court-a judge R Vanlalvena chuan, hmeichhe tleirawl pawng­sualtu Lalchhuan­awma (18) s/o Hramliana (L), North Khawbung chu kum 18 chhung jail-a táng tur leh Rs. 9,000 chawi turin a hrem. Champhai Police aṭanga thu dawn danin, June 9, 2014 khan hmeichhe tleirawl kum 17 vel mi chu a chhungte'n an fehsan hlanin an in bula public water point aṭanga tui a khai chu a tawlh thlu a, in chhungah lutin a thuamhnaw huh thlak tura bed room lam a pan chu Lalchhuanawma'n a luh chilh a, khumah a pawngsual a ni.

Lalchhuanawma hian tleirawl a pawngsual lai hian páwn lam aṭangin nu pakhatin kawngka a kik a, Lalchhuanawma chuan tleirawl chu vau betin, kawngka kiktu a kalsan hnuah a pawngsual chhunzawm a ni. June 9, 2014 tlai dar 3 velah Lalchhuanawma chu hmeichhia tleirawlte inah kal lehin, a pawngsual nawn leh bawk.

He thil thleng hi a tirah chuan hmeichhe tleirawl hian a sawi chhuak mai ngam lo. Ni khat chu a u hmeichhia nen chauha in an nghah ṭumin, an ṭhiante ina an léng chu a u chuan haw turin a ko a, mahse, a haw ngam loh thuin a chháng. A u chuan eng vanga amaha ina awm ngam lo nge tih a zawh chuan, Lalchhuanawma a hlauh thu a sawi chhuak a, chumi hnu chuan a nu leh pate loa feh an hrilh nghal a ni.

He thil thleng hi FIR an dawng angin Champhai Police chuan an chhui zui a, an thil chhui chhuah leh thuhretu thusawi aṭangin Champhai District Special Court chuan Lal­chhuanmawma chu kum 18 chhung jail-a táng tur leh Rs. 9,000 chawi turin a hrem ta a ni.