Mahatma Gandhi pian champha pualin Raj Bhavan-ah seminar buatsaih a ni

General Administration depart­ment (GAD) leh Governor Secretariat ṭangkawp chuan nimin Raj Bhavan Durbal Hall-ah Mahatma Gandhi pian cham­pha vawi 150-na pualin 'Gandhian approach to sustainable development' tih thupui hmangin seminar an buatsaih a, Governor Kummanam Rajasekharan-a'n a hmanpui.

Governor chuan, tunlai hma­sawnna ṭhang mek leh hausakna kawnga intlansiaknaah boruak, tui leh leilungte nasa taka tihchhiat a nih mek thu a sawi a, "India hnampa, Mahatma Gandhi-a'n zirtirna leh hmasawn dan ngêlnghet neih theih dan kawng lo sawi ṭhin chu zir chian leh zawm a ngai tawh tak zet a ni," a ti.

Gandhi-a zirtirna aṭang chuan ram leilung hauhsaknate chu mi tin eikhawp pe chhuak turin a tam tawk tih sawiin Larsap chuan, "Mahse, mi tin duhamna tihhlawntlina khawpa tam erawh a ni lo a ni," a ti a; bungraw inchhek khawl siaka hausa ber nih inchuh a, environ­ment ngaihthah chu hun la kal zel tura ṭhangtharte tan chhiatna leh ṭàm thlen thei a nih thu a sawi.

Governor chuan, hmasawna ngêlnghet tihin a kawh ber chu, tu leh fa, ṭhangtharte'n an khamkhawp an thawh chhuah theihna tura ram leilungte dimdawi taka enkawl chunga tuna mamawh tâwk nei thei tur a hmalak a nih thu a sawi a, "Hman tlem, hman leh theih tura siam danglam leh hman nawn inzitir leh a taka kalpui a pawimawh," a ti.

Seminar hi chief secretary Arvind Ray-a'n a kaihruai a; Mizoram University-a Mizo department HoD Prof. Laltluang­liana Khiangte, Aizawl Theological College-a associate professor Rev. LH Rawsea leh Pachhunga University-a assistant professor Dr Saithanmawii ten paper an present a ni a, sawihona hun hman a ni bawk.