KHAWTHLIR

CEO tur rawt
Mizoram sorkar chuan tun hnai khan Mizoram Chief Electoral Officer (CEO) atan mi pathum a rawt a, Election Commission of India (ECI)-ah an hming a thehlut. CEO atana Mizoram sorkarin an rawtte chu IAS vek niin, Mizoram sorkara secretary hna thawk lai vek an ni a, H Lalengmawia, K Lalthawmmawia leh Lalhmingthanga te an ni. Hetih lai hian, Mizoram Election department chuan, CEO tur chungchangah ECI aṭangin thu an la dawn loh thu an sawi.

MZU-ah convention
Mizoram University-a School of Life Sciences chuan nimin khan MZU Auditorium-ah 12th. Annual Convention of Association of Biotechnology and Pharmacy on Biodiversity, Environment and Human Health: Innovations and Emerging Trends (BEHIET-2018) an buatsaih a, November 14, 2018 thleng a awh ang. Conference-in a tum ber chu, khawvela university leh institute hrang hranga zirlaite leh thawktute thawhona ṭha zawk an neih theih nan leh hmun leh hmuna research idea hrang hrang inhrilhtawnna atan a ni.

Indo-Burma zirho
Pachhunga University College diamond jubilee lawmna kal zelah, nimin khan PUC Seminar Hall-ah Geological Society of Mizoram leh PUC Geology department-te'n 'International workshop on ‘Geological Research in Indo- Burma Ranges’ an buatsaih. Seminar-ah hian Mizo zinga UPSC hnuaia geologist hmasa ber Geological Survey of India-a thawk mek Priscilla Rinmuanpuii leh Lamont- Doherty Earth Observatory, Columbia University-a thawk mek Dr Paul Betka ten paper an present a ni.

Bru ADC duh lo
Hachhek Constituency Development Committee (HCDC) chuan thuchhuah siamin, Mizoram Bru Indigenous Democratic Movement (MBIDM) intite'n tun hnaiah thuchhuah siam a, Mizoram khawthlang lamah Bru-te tan autonomous district council an phût chu an remtih loh thu an tarlang a, "An area tur an rìn hi kan pianna ram, kan pi leh pute lu phûmna, kan ram ngei a nih avangin engti kawng mahin Bru ADC pek theih a ni lo a, khawvel la awm zel turah pawh Hachhek constituency-ah Bru ADC a pian kan phal ngai dawn lo," an ti.