Party dangte'n dâwtin min bei - Zoramthanga

MNF president Zoramthanga chuan nimin khan Congress party aṭanga MNF party zawm thar mi ṭhenkhatte an party-ah a lawm lut a; Mizo Hnam Rûna lawm luhna inkhawmah thu sawiin, an party boruak a ṭhat avangin party dangte'n MNF chu BJP nen thawkho tiin dâwtin an bei niin a sawi.

Zoramthanga chuan, MNF chu BJP nen an thawh dun loh thu sawiin, "Heti taka kan boruak a ṭhat avangin party danga unaute'n a rawih theih theih ruaiin min beih rawn a, 'kih hnawk' tih ngawt kha a rem tawh si lo. 'BJP nen in thawkho' tih dâwt thu chu an sa nawn tluk tluk a. BJP-in bial 40 awmah Aizawl S-II tih loh chu candidate an nei vek a, keini pawhin bial 40-ah candidate kan dah kim vek. Kan thawhho lohzia a lang chiang a ni," a ti.

Eng inthlanah mah BJP nen an la ṭang dun ve lo nia sawiin Zoramthanga chuan, "Pu Hawla'n BJP kan support-na kan withdraw a ti a, mahse, CADC-a Congress leh BJP thawhhona kha officially-in Governor-in a nemnghet a, a pangngaiin an sorkarna a la kal reng. BJP nena thawkho zawk chu Congress an ni," a ti a; Pathian zarah MNF-in a malin sorkarna an siam dawn avangin BJP leh party dang an thawhpui a ngai dawn lo niin a sawi.

MNF President chuan, "Pathian leh mipui zarah kan sorkar ang a, zu kan khap bur ang. Sikul kai hun hi kum 100 kan kalpui tawh, a pangngai ang khan kan kalpui leh ang. Zu leh drug-a buaite enkawlna tur India rama centre ṭha ber pawl ni thei tur chu pastor, doctor, sport leh eduacation lam nen ṭangrualin kan din ang. Vehicle tax kum 15 lak mek hi a petute duh dana kalpuiin tihluihna kan hmang ve lo ang," a ti.

Zoramthanga chuan, Congress party chu an vice president, Assembly Speaker, minister, MLA, an general secretary leh unit hruaitute'n an chhuahsan ruih ruih nia sawiin, "A tam ber chu kan party-ah an lo lut a ni. Congress chhungkuaah hian kan va inrawlh a ni lo, Pathianin kan rama Congress rorelna hi tawp tawh se a tih vang zawk a ni," a ti a; sorkar mai tur party-ah Pathianin hna thawk tur a dah khawm niin a sawi.

MNF party-in nimina an lawm luh zingah hian MPCC secretary K Lalnghakliana pawh a tel a ni.