Pathian leh mipui hmaa rinawmna Thutiam late lei theih an ni lo - Duhoma

ZPM chief ministerial candidate Lalduhoma chuan nimin khan an pisaa inkhawmah thu sawiin, ZPM chuan beihna hrang hrang tâwk mah se, Pathian­in a hnehsak zel thu leh, Pathian leh mipui hmaa rinawmna thutiam late chu lei theih an nih loh thu a sawi.

Lalduhoma chuan, Narendra Modi-a prime minister-a lak luh a nih dawnah sàwm a nih anga a tel thu sawiin, chumi ṭum chuan BJP-te'n thawhpuiah nasa takin an sáwm niin a sawi a, "Zoram hmasawnna atan ṭha tur nia kan hriat vangin kan zawm ve a, mahse, an mizia leh kalphung kan hriat chian hnuah chuan thawhhona kan titawp a ni. ZNP-te NDA aṭanga kan chhuah hnu lawkah MNF unaute chu NEDA-ah an inziak lut ve nghal ta thung. ZPM a pian hnuah BJP thawhpui hi engtik lai mahin kan duh lo, kan tum hek lo," a ti.

Regional party tharte chu recognise an nih hma chuan inthlanah independent-a an chuh a ngai ṭhin a, MNF leh PC-te pawh independent vekin an lo ding tawh tih sawiin Duhoma chuan, "Mizoramah BJP hian MLA 15 vel nei thei se chuan sorkarna siam turin MLA tlem chu lei belh an tum mai thei a, mahse, MLA neihna chance nei lo tan sorkarna siam tura an inlei tlin a rinawm lo," a ti a; ZPM candidate-te chu Pathian leh mipui hmaa rinawmna thutiam la an nih avangin BJP-in an lei theih loh tur thu a sawi.

Lalduhoma chuan, ZPM sorkarah chuan sorkar hnathawkte kutphuar phelh a ni dawn tih sawiin, "Political interference hi kan titawp ang a, kan officer-te'n an thiamna leh finna hmangin an department-te tha takin an enkawl thei tawh dawn. Transaction of Business leh Delegation of Financial Rules kan ennawn ang a, Schedule-I, II leh III level-a an thutlukna siamnaa minister inrawlh ṭhin tihtawp a ni ang," a ti.

ZPM CM Candidate chuan, tun ṭuma inthlanpuiah NGO Coordination Committee-te thu zâwm leh zâwm lote an inkhing mek tih sawiin, "Tuna kan vote thlak dan aṭang hian NGO-te thu ngaih pawimawhna nge, engamaha ngaih lohna a hrin chhuah dawn tih kan ngaihtuah thlen a ngai. Kohhranin an duh leh duh loh an lantir a, zu zawrh leh a thlawna pawisa sem an duh lo a, Bible zirtirna pawh a kalh a ni," a ti a; mipuite hi kohhan mi vek an nih avangin an vote hmanga kohhran duh dan lantir turin a chah.

ZPM-te'n tisa leh thlarau lamah Pathian malsawmna nasa tak an dawng tih sawiin Lalduhoma chuan, "Kan Pathian chuan Mizo mipui thinlungah hna a thawk mek a, Mizoramah rorelna ṭha a thleng thuai dawn niin kan hria," a ti a; Mizoram siam ṭhat duhtute zawng zawng ṭawngṭaipui turin a sáwm a ni.