Project Himna-MADAT training buatsaih

Aizawl DC Office chuan Project Himna-MADAT (Mizoram Against Drug Abuse and Tobacco) a kalpui mekah middle school zirlaite hnena zirtirna pe chhawngtu tur zirtirtute pualin nimin aṭang khan Central YMA Hall leh Aizawl district SSA conference hall-ah training an buatsaih.

'Training of Nodal Teachers' hi nimina ṭan a nih hnuah vawiin, November 15-16 chhungin chhunzawm a ni dawn a; CYMA Hall-a neih chu Aizawl DC Dr A Muthamma-i'n a hawng a, SSA Hall-a neih chu IASE principal Prof. Vanlalhruaii'n a hawng thung.

Training-ah hian Aizawl district chhunga Project Himna-MADAT hnuaia sikul thlan zinga SSA Block Resource Centre (BRC) pali - Sikulpuikawn, Bawngkawn, Aibawk leh Chhinga Vengtea Himna-MADAT nodal teacher-te leh kohhran pawl hrang hranga Himna-MADAT hnuaia community coach-te an tel. October 24, 2018-a tlangzarh, Project HIMNA-MADAT hnuaia middle school naupangte tana buatsaih zirlaibu pahnih - Module I & II-te zirtirtute'n an naupangte an zirtir dan tur leh community coach-te'n an huang chhunga an zirtir dan tur an inhrilhfiah a ni.

Project HIMNA-MADAT hnuaiah hian Aizawl district-a middle school 227-a zirlai naupangte ruihhlo laka an filhlim theih nan hmalak mek a ni.