Rualbanlote vote thlak dan tur sawiho

Nimin khan Lawngtlai DC conference hall-ah district election officer (DEO) N Chakhai hoin an district chhunga constituency pathuma MLA inthlan buatsaih tura pianphunga rualbanlo (PwD)-te tana awlsamna tur ruahmanna siam chungchang sawiho a ni.

Lawngtlai district chhunga constituency pathumah hian BLO-te hnena pianphunga rualbanlo, persons with disability (PwD) mi 131 inhriattir an awm a, polling station 161 awmah wheelchair mamawhna tur polling station 27 awmin, wheelchair 27 hi lei tawh a ni. Ramp mamawh pawh siam zawh tawh niin, PwD-te buaipui tur hian CYLA leh CYCA-te beisei an ni a, anni hian tlawmngaiin an lo buaipui dawn a ni. Mitdel leh rilru lama harsatna nei polling booth-a luhpui ngai an awm chuan mi pakhatin luhpui phal a ni.

Inthlanpui lo awm turah hian mah­-nia vote thlak harsatte tan rua­hmanna hrang hrang siam a ni a; mahnia kal thei lo, wheelchair-a nawr ngaite tan an mamawh tur wheelchair leh a nawrna kawng tur ramp ruahman a ni. Mitdelte tan midel hawrawp (braille) hmanga vote thlak theihna ruahman a ni bawk. He'ng harsatna neite hi a ṭul chuan polling official-te lirthei hmanga hruai leh thlah turin an ruahman.

Lawngtlai district chhunga PwD-te tan sum sêng loa an duh ang an zawhfiah theihna tur dedicated toll-free helpline siam a ni a, phone number 03835-232230-ah an tana ruahmanna siam chungchang leh an hriat duhte an zawtfiah thei a ni ang.