Thutiama ding lo leh zu nghei thei lo Kan ramin a nei peih lo - K Sapdanga

Zoram Peoples Movement (ZPM) leader K Sapdanga, Aizawl East-I biala ZPM candidate chuan nimin khan Muthi khuaah ZPM campaign office a hawng a, thu sawiin, "Kan ram hian damchhunga rawngbawl tura nemngheh Kohhran Upa ngei Chief Minister neih a nghakhlel ta hle a ni" a ti.

K Sapdanga chuan, tun aṭanga ni 15 ral hnuah kum nga atana ram hruaitu tur thlan a nih dawn thu sawiin, "Inthlan hnuhnung vawi li kan hmachhawn tawhah mipuiin inthlan kan nghakhlel lo. Kuminah chuan thil mak a thleng a, neutral-in vote thlak vat vat an duh. An vote tur chiang ZPM tan campaign a nuam hle a ni," a ti a; ZPM tana campaign-a mi ina an luhin 'Kan lo ṭang nasa teh asin' tih chu an thu dawn tam ber a nih thu a sawi.

Ṭhahnem ngai taka an thawh rualin, an pawl mi leh sate chu Pa­thian malsawm tlaka vote zawng tura chahin K Sapdanga chuan, "Inthlan ni thlengin ramhlui zia ni lova, ramthar zia anga vote zawn a pawimawh. Pathian duh dana kan kal hmasak phawt chuan malsawmna kan dawng em em ang tih hi ka rin dan a ni," a ti.

ZPM Leader chuan Aizawl East I bial chu Aizawl rim nam bialah chuan kuthnathawktu tam bera bial an ni tih sawiin K Sapdanga chuan, "Bial mipui 90% vel hi kuthnathawka eizawng an ni a, kum 40 chhung rulling MLA bial an ni tawh chunga mirethei tamna bial an la ni," a ti a, ZPM an sorkar chuan kuthnathawktuten an thawh phu tawk hlawk­na an tel theihna atan hma an lak nghal tur thu a sawi.

Nimin vêk khan RSC Field, Ramhlun North-ah ZPM campaign office hawnna inkhawm neih niin, a hawngtu ZPM CM candidate Lalduh-oma leh Aizawl North-II biala ZPM candidate Dr Vanlalthlana ten thu an sawi.

Dr Vanlalthlana chuan, MLA-a thlan tlin a nih huna a bial chhung­a kawng siam leh chei ṭhat a tum thu a sawi a; infiamna lamah chhun leh zana infiamna tur a ngaihtuah tur thu te, ṭhalaite leh chhangchhia leh nunau awm chunga an thawh theih tur ang ang ngaihtuahsak a tum thute a sawi bawk.