Speaker leh MP-in Zorinpui an tlawh

Assembly speaker Lalrinliana Sailo leh Rajya Sabha MP K Vanlalvena te chuan nimin khan India leh Myanmar insumdawn tawnna tura buaipui mek, Zocha­chhuah hmuna Zorinpui an tlawh. Kaladan Multi Modal Transit Transport Project (KMMTTP) hnuaia hmalakna te, kawng siamtu company leh contractor-te hnathawh an enfiah.

Speaker chuan, KMMTTP chu Asia chhimchhak ramte nena inkalpawhna kawngpui pawimawh tur a nih thu sawiin, sorkar laipui pawhin a ngaih pawimawh thu a sawi a; insumdawn tawnna leh a panna kawngpui chu Zo fate rinpui ber tur, inkalpawhna kawngpui pawimawh tak tur a nih avangin 'Zorinpui' tiin kum 2011-ah an phuah thu a sawi a ni.

Lalrinliana Sailo chuan, KMMTTP chu kum 2011-a bul ṭan tawh a nih thu sawiin, "Kum 2014-a zawh tur a niin kan hria. Tunah kum 2020 tàwp lam kan thleng dawn tawh a, tun thleng hian lei dawh lohte a lo la awm nual mai a, working progress ṭha vak lo hi a pawi hle a ni," a ti.

MP K Vanlalvena chuan, "India ram khawpui hmun tam tak aṭanga Mizorama bungrua lo lut tur hian Zochachhuah a rawn kal tlang dawn a ni," a ti a; Zochachhuah chu Mizorama khaw pawimawh tak a nih dawn thu a sawi.

Speaker leh Rajya Sabha MP-te hi MNF vice president Vanlalzawma leh MNF party hruaitute'n an ṭawiawm a; Zochachhuahah van­tlang inkhawm an nei nghal a ni.