Mizoramah thla 6 chhungin TB vei Mi 1,000 chuang hmu chhuak

Nimin khan Secretariat conference hall-ah State TB Forum meeting neih a ni a; kuminah April-September chhungin Mizoramah ngawr natna - Tuberculosis (TB) vei mi 1,000 chuang hmuh chhuah a nih tawh thu leh TB veite'n Covid-19 an kài leh kài loh endik tum a nih thu tarlan a ni.

Ṭhutkhawm hi Health & Family Welfare secretary H Lalengmawia'n a kaihruai a; TB programme hmalak mekna leh hmalakna tur te, TB programme-in harsatna a tawhte sawiho a ni. Ngawr natna ûmbona tura sorkar laipuiin campaign a huaihawt, 'TB Harega Desh Jeetega' chu kumin chhunga kalpui turin hmalak dan tur an rél bawk.

TB leh Covid-19 endik kawp chungchang pawh sawi a ni a; TB vei zawng zawngte chu Covid-19 an vei leh vei loh endik vek tura rèl a nih bakah, Covid-19 vei leh rinhlelhte pawh TB an vei leh vei loh endik vek tura tih a ni.

Lungleia NTEP aṭanga TrueNAT khawl Covid-19 sample endikna atana hman mek chu TB programme-a lâk lêt lehna tura ruahmanna siam chungchang an sawiho a; district tina TB centre zawng zawnga medical officer mamawhna te, district TB officer post nghet a awm theih nan a ṭul anga hmalak leh, post dang mamawhte pawh an sawiho.

Ṭhutkhawma an tarlan danin, kumin April-September, thla ruk chhungin Mizoramah TB vei mi 1,000 chuang hmuh chhuah a ni a; MDR-TB enkawl lai mek mi 90 an awm. TB leh HIV vei kawp mi 117 hmuh chhuah a ni bawk.