MGNREGS hnuaiah Mamit dist-ah Ni 87 inhlawhna siam a ni tawh

Mamit District Development Coordination & Monitoring Committee (DISHA) chu nimin khan an chairman C Lalrosanga, Lok Sabha MP hoin DC conference hall-ah an ṭhukhawm. Sorkar kum kal mek 2020-21 chhungin MGNREGS hnuaia ni 87 inhlawhna siam a nih tawh thu an tarlang.

C Lalrosanga chuan, DISHA meeting chu mipuite’n an aiawha an thlan MP, MLA-te leh sorkar official-te bakah, khawtlang hruaitute inkara thawhhona ṭha a awm theih nana buatsaih a nih thu a sawi a, ''Sorkar laipui aṭanga hmasawnna tura scheme duante uluk taka vil leh en zui a nih theih nan meeting neih ṭhin a pawimawh. MGNREGS hnuaia ni 100 inhlawhna hi Covid-19 avangin ni 30 siam belh turin Central RD department-ah nawr mek a ni," a ti.

Ṭhutkhawma tarlan danin, MGNREGS hnuaiah sorkar kum kal mek chhungin Mamit district-a khaw 99-a job card nei mi 21,700-te tan ni 100 inhlawhna siam tum a ni a, tun thlengin ni 87 inhlawhna siam a ni tawh.

Meeting-ah hian Mamit district-a MLA pathum - Lalrintluanga Sailo, H Lalzirliana leh Lalrindika Ralte-te bakah, district bawrhsap Dr Lalrozama, sorkar official-te leh khawtlang hruaitute an tel a ni.