Health care bill bat zat vbc. 59.63 ; 'Tlin leh tlin lo chungin kan theihtawp Kan chhuah zel a ni' - Chief Minister

Nimina Assembly session-ah Health minister Dr R Lalthangliana chuan INC member Lalrindika Ralte zawhna chhangin, Mizoram State Health Care Scheme hnuaiah bill táng cheng vbc. 59.63 a awm thu House a hrilh. Chief minister Zoramthanga chuan, health care scheme-ah tlin leh tlin lo chungin theihtawp an chhuah zel thu a sawi.

Chief Minister chuan, Health Care Scheme (HCS) chu tlin leh tlin loa kalpui a ni tih a chian thu sawiin, "Ṭha kan ti si a, state dang pawhin an tih theih loh state pachhe berin kan ti. Mipui harsatna sutkian tumin beihpuiin kan bei. Covid-19 avangin health care atan a hlâwmpuiin kan dah thei lo. Bill báte a khát tâwkin sum dinhmun azirin kan rûl chho zel, mipui pawh an zahawm," a ti.

Sum dinhmun a ziaawm chho tura ngaih a nih thu sawiin Zoramthanga chuan, "A hma aiin bill mipuiin an hmuh ṭhat zel ka ring. Tlin leh tlin lo chungin theihtawp kan chhuah zel a ni," a ti a, sorkar kum tharah chuan ṭha zawka bill an pek theih ngei a rin thu a sawi.

Dr R Lalthangliana chuan, HCS chu MNF sorkar hmasaah kum 2008 khan Chief Minister ngaihtuah chhuaha ṭan a nih thu sawiin, "Cheng vbc. 50-in bul ṭan a ni a, chumi hnuah corpus fund-ah ADB aṭanga sum pûk US dollar maktaduai 20 dah leh a ni. Sorkar tharah kum 2019 khan CM hoin natna zawng zawng huam thei turin health care kalpui leh rèl a ni a, corpus fund-ah cheng vbc. 50 dah belh a ni," a ti.

Health Minister chuan, HCS-ah inziak lut an pun thu sawiin, "Finance department-in theihtawp an chhuah a, corpus fund atan ADB sum cheng vbc. 1,000 an buaipui mek. Sorkar laipuia paltlang ngai hrang hrangte an paltlang tawh," a ti a, ADB sum chu HCS corpus fund atan hmuh leh theih a nih chuan harsatna sutkian theih a nih ngei an beisei thu a sawi.

Health Minister tarlan danin, October 1, 2021 aṭanga March 31, 2022 inkar atan HCS registration pawhseina atana sum tlingkhawm chu cheng nuai 300.21 a ni a; chumi chhunga registration pawhseinaa tel, damlote'n bill an la thei rih lo. Bill táng pek theih loh chhan chu sum indaih loh vang a ni.