PMGSY hna zawh loh 137 zingah Kum 2007-08 a ṭan tawh a tel

PWD changtu chief minister Zoramthanga chuan March 7, Thawh­ṭanni khan ZPM member Vanlalhlana zawhna ziaka chhángin, Mizoramah PMGSY hnuaia hnathawh tun thlenga la zawh loh 137 a awm thu House a hrilh.

Vanlalhlana zawhna chhannaah PMGSY hnuaia hna la thawh zawh loh awm zat hi 137 tia tarlan a nih laiin, la thawh zawh lohte a kimchanga tarlan (list)-ah chuan 136 a ni thung a; chu'ng zingah chuan kum 15 kal ta, 2007-08 leh kum 14 kal ta 2008-09-a thawh ṭan tawh pakhat ve ve a tel.

Kum 2007-08 a hna pek tawh tuna la thawh zawh loh chu Siaha district-a Niawhtlang leh Chakhang inkar kawng a ni a, contractor hming tarlan chu Biakliana niin, zawhna dang chhannaa tarlan angin sum rua­hman zat chu cheng nuai 569.29 a ni.

Kum 2008-09 chhunga hna pek tawh, tun thlenga la thawh zawh loh chu Siaha district-a Tawng­kolong leh Longmasu inkar kawng a ni a, contractor chu GSR Ventures Pvt. Ltd niin, sum ruahman chu cheng nuai 1,581.43 a ni.

Hna la thawh zawh loh chhan tarlante chu - Mizoramah fûr a rei avangin working season a tlem tih te, Covid-19 pandemic avangin lock­down a tam tih te, Covid-19 pandemic avangin vai labour an ramah an haw nasa, labour indaih loh a nasa tih te, Covid-19 pandemic avangin hun rei tak bungrua a lak luh theih loh tih te, Mizoram-Assam ramri buai avangin hun rei tak bungrua lak luh lamah harsatna an tawk tihte a ni.