Skywalk leh ropeway siam zawm loh sorkarin a la serious - Tourism Minister

Tourism minister Robert Romawia Royte chuan INC member C Ngunlianchunga zawhna chhangin, skywalk leh ropeway siam hna thawk tur contractor JV NEIP-te'n hna an thawk chhun­zawm lo chu state sorkarin a ngaih thutak thu nimin khan House a hrilh.

Skywalk leh ropeway siamna tur sum tam tak sên ral a ni chunga hma­lakna a chawlh tâk vek chungchanga sor­kar hmalakna zawhna chhangin Robert Romawia chuan, "Sum tam tak la tawh si a, contractor-te'n skywalk leh ropeway siam an chawlhsan hi a pawi hle," a ti a, Mizoram sorkarin theihtawpin hma a la mek tih a sawi.

Tourism Minister chuan, contractor (JV NEIP) chu sorkarin vawi tam tak ṭawngka leh ziakin a vau tawh a, warning bak­ah show cause notice leh explanation an pek fo thu sawiin, "Hetianga department thu an ngaih pawimawh loh avangin February 3, 2022-ah Mizo­ram Lokayukta-ah complaint thehluh a ni tawh," a ti.