Buhfai a tláwma tam zawk lei theih nan Parliament-a au chhuah ka inhuam - K Vena

Rajya Sabha MP K Vanlalvena chuan, Food Corporation of India (FCI) aṭanga Mizoramin buhfai man tlâwm tam zawk a lei theih nan Parliament-ah au chhuahpui a inhuam thu a sawi.

K Vanlalvena hian nimin khan Aijal Club-ah thuthar thehdarhtute a kâwm a; FCI aṭanga man tlâwm zawka buhfai lei ṭhin chu Mizoram mamawh khawp a tlin loh nasat thu sawiin, "Tunah hian thla khatah FCI aṭangin a man tláwmin buhfai qtl. 50,000 kan lei thei a, Mizoram mamawh chu quintal nuai khat chuang a ni thung. Man tlâwm zawka hei aia tam kan lei theih nan a ṭul chuan Parliament-ah ka au chhuahpui ang," a ti a, FCI aṭanga buhfai man tláwma lei chu Mizoram sorkar sum humna tur a nih thu a sawi.

Fûr thleng tur atan buhfaiah harsatna a awm loh nan Mizoram sorkar leh FCI-in theihtawp an chhuah mek thu sawiin K Vanlalvena chuan, "Mizoram hian FCI Divisional office chauh kan nei a, hmarchhak state zingah Tripura leh Meghalaya-te nen FCI main office nei lo kan ni a, Shillong kan inṭâwm vek. Mizoramah FCI main office a awm theih nan hmalak a ngai a ni," a ti.

FCI hotute tarlan danin, tun dinhmunah Mizoramah FCI kudam (depot) paruk a awm a, Khawzawlah buhfai qtl. 3,340 dah theihna tur kudam ruahman mek a ni. March 7, 2022 thleng khan FCI kudam paruk - Aizawl, Lunglei, Kolasib, Lawngtlai, Bairabi leh Bualpuiahte buhfai qtl. 1,02,650 a awm.

Mizoramin FCI aṭanga a man tláwma thla khata buhfai qtl. 50,000 a lei theih bak chu a man toin FCI aṭangin lei belh theih a ni a; mahse, open free market (OFM)-ah a man tláwma lei theih a nih avangin Mizoram sorkar chuan OFM aṭangin Mizoram buhfai mamawh zinga 40% vel a lei ṭhin a ni.