Cheng vbc. 1,860 hmangin Aizawlah Hmasawnna hna thawh a ni dawn - Dy CM

UDPA changtu deputy chief minister Tawnluia chuan, cheng vbc. 1,860 hmangin Aizawl khawpui hmasawnna leh changkanna tur hna thawh a nih dawn thu nimin khan House a hrilh.

MNF member Zothan­tluanga zawhna chhangin Dy. Chief Minister chuan, Aizawl Sustainable Urban Transport Project (ASUTP) hnuaia project readiness financing consultant rawihna atan ADB aṭangin loan US dollar nuai 45 hmu turin inremna (agreement) ziah a nih thu a sawi a, "Hei hi reimbursement anga kalpui tur a nih avangin loan amount a taka hmuh a la awm lo," a ti.

ZPM member Van­lalhlana'n ASUTP kal­phung tur a zawhna chhangin Tawnluia chuan, "Kum 2019 aṭangin bawhzui a ni a, Ministry of Finance hnuaia Department of Economics Affairs-ah thehluh a ni. Pawisa hmuhna tur min ngaih­tuaha ADB dawrin, ADB hian loan lak an lo remti a ni," a ti a, Ministry of Finance chuan ADB-a sum pûk tura thil ṭulte an buaipui mek thu a sawi.

Dy. Chief Minister chuan, ASUTP chu a len tham thu sawiin, "Aizawl khawpui chei mawina a nih piah lam­ah hmasawnna leh chang­kanna tur a ni. International level-ah tender chhuah a ni a, December 8, 2021 khan consultancy firm rawih tur thlan a ni. Project atana budget pumpui chu cheng vbc. 1,860 a ni a, 80% chu ministry rulh tur niin, 20% chu kan rulh tur a ni," a ti.

Tawnluia chuan, consultancy firm-in kumin kum tir aṭangin Aizawl khawpui zir chian hna an thawh thu sawiin, "Kawngpui siam­ṭhat, flyover, bus leh truck terminal, ropeway, junction improvement, etc. a huam. Hetiang thawh theihna hmun tura an hriatah chuan DPR an siam ang," a ti a, zirchianna chu thla 36 chhunga zawh tur a nih thu a sawi.