KHAWTHLIR

ILP 44,241 pe
GAD changtu chief minister Zoramthanga chuan kum 2020-21 chhungin inner line permit (ILP) 44,241 pek chhuah a nih thu, ZPM member Vanlalhlana zawhna ziaka chhangin House a hrilh a, "ILP aṭangin revenue Rs 2,96,52,524 sorkarin a hmu," a ti.

Vaccine dose 14,86,873 pe tawh
March 7, Thawhṭanni thleng khan Mizoramah mi 8,08,616 hnenah Covid-19 vaccine dose 14,86,873 pek tawh a ni. Vaccine la tawh mi 8,08,616 zinga 6,53,686 chuan dose hnihna an la tawh a, dose hnihna la tawh zinga mi 24,571-in precautionary dose an la tawh. May 7 bikah khan vaccine dose 580 pek a ni a, dose khatna 77, dose hnihna 427 leh precautionary dose 76 a ni.

Ṭanpuina hlan
Khawzawl bawrhsap CC Lalchhuangkima chuan nimin khan Tlangpui Village Task Force hnenah Covid-19 vanga chhungkaw harsa zualte chhawmdawlna tur leh Covid-19 dona hmanrua eng emaw zat a hlân. Tlangpuiah hian Covid-19 vei enkawl lai mi 49 an awm mek a ni.

Mau hlawhtlinna
Horticulture enkawltu chief minister Zoramthanga chuan March 7, 2022 khan INC member Zodintluanga Ralte zawhna ziaka chhángin, "Mau chi mipui hnena pek chhuah success rate (hlawhtlinna dinhmun) chu tun dinhmunah field-a chhiar thlap thlap theih a ni lo a, a tlangpuiin 70-75% vela ngaih a ni," a ti.

Heroin man
Excise & Narcotics department leh Assam Rifles-te chuan nimin zing dar 3:15 khan Zokhawthar, Champhai district-ah heroin kg. khat leh gram 308 (hawng 100) leh a neitua puh PC Lalchhanchhuaha (20) s/o PC Lalchhunglawma, Bungzung, Champhai district nia inchhál an man. Heroin an man hi Rs 5,23,20,000 man a nih thu Assam Rifles chuan an tarlang.Excise & Narcotics enforcement-te chuan March 7, Thawhṭanni chhun dar 1:25 khan Tuirial Airfield-ah heroin gram 107 (hawng 9) leh a neitua puh Lalnunkimi (33) d/o K Ramthanga, Turial Airfield venga khawsa nia inchhál an man bawk.

Sum chawi zat Nuai 212.43
Home minister Lalchamliana chuan INC member Lalrindika Ralte zawhna ziaka chhángin, kum 2021-22 chhungin zan curfew bawhchhia, mask vuah lo leh Covid-19 dan bawhchhiate sum chawi tling khawm chu Rs 2,12,43,340 a nih thu a tarlang.

Sangha khawi
Fisheries department leh College of Fisheries, Tripura chuan Mizorama sangha khawitute tan Lengpuiah sangha enkawl dan zirna an buatsaih. He hunah hian Aizawl district leh Mamit district-a sangha khawitu mi 30 an tel a, College of Fisheries, Tripura-te lâk luh sangha chi thar Pengba notê eng emaw zat Lengpui Fish Seed Farm-ah dah nghal a ni.

AFSPA hmang lo
Home minister Lalchamliana chuan Lalduhoma zawhna ziaka chhángin, Mizoramah The Armed Forces (Special Powers) Act, 1958 hman a ni lo tih March 7, 2022 khan a tarlang.