Speaker zahawmna tibawrhbángah MPCC-in speaker Rinliana an puh

Mizoram Pradesh Congress Committee (MPCC) chuan thuchhuah siamin, Assembly speaker Lalrinliana Sailo chu Speaker zahawmna tibawrhbángah an ngai a, Speaker aṭangin thlak an duh thu an tarlang.

MPCC chuan, speaker Lalrinliana Sailo chu Lawngtlai district-ah ramri tlawh tur anga sawi ni mah se, November 13, 2020-a MNF Gen.Hqrs General Secretary (GAD & Detailment)-in LADC inthlannaa kal tur detailment a siamah serial no. 3-ah a awm thu an tarlang a ni.

Assembly Speaker-in November 17-a Zorinpui kaltlanga insumdawn tawnna tur buatsaih mek a enna turah party mi leh sa tam tak a hruai chu mak an tih thu sawiin MPCC chuan, "Minister dangte hna chanpuala inrawlh loin, a hna chanpual hneh takin enkawl zawk turin kan hriattir a ni. Ram dangte nena insumdawn tawnna tura hmalakna hi Commerce & Industries minister Dr R Lalthangliana kutah ngaihngam taka dah turin kan hriattir bawk," an ti.

Congress party chuan, Speaker chu party mi a nihna dahṭha a, Assembly House chhunga rorelna lái taka kaihruaitu tur leh páwn lamah pawh party mi leh sa a nihna tilang loa zahawm taka khawsa tur a nih thu an sawi a, "LADC inthlan awm tura Lawngtlaia MNF hruaitute ko khawma a campaign hi kan hrethiam lo hle. Speaker zahawmna a tihbawrhbàn nasat avangin a rang thei ang berin thlak ni rawh se," an ti.