Political party-te’n hmeichhe ní an hmang

Political party pathum - Congress, ZPM leh BJP party-a nu ho pawlte chuan nimin khan a hran ṭheuhin International Women’s Day an hmang. Day thupui chu ‘Equality today for sustainable tomorrow, break the bias’ tih a ni.

Congress Mahila chuan nimin khan MPCC President pisaah International Women’s Day an hmang a, an president Vanlalawmpuii Chawngthu-in kaihruaiin, MPCC president Lalsawta’n a hmanpui.

Lalsawta chuan, mipa leh hmeichhe inkar zau awm thei tihbo zel a ngaih thu sawiin, hmeichhiate’n hma an sawn theih nan ṭanrual zel a ṭul thu a sawi a, “Mahni hmeichhiatpuite ngainêp tlat, rilru hrisel lo leh him lo put a hlauhawm a ni,” a ti.

Hmeichhiate huaisenna leh chhelzia sawiin Lalsawta chuan, “Mipa tam tak hian hmeichhiate tawrhna ang tuar tur ni ila khawvel mihring hi kan chimit hial tawh a rinawm. Hmeichhiate chuan hrehawmna leh harsatna tam tak an pawmin an tuar tlang thei a ni,” a ti a; Mizo inneih, inṭhen leh ro luahna dan The Mizo Marriage, Divorce and Inheritance of Property Act, 2014 chu tihchangtlun zel a ṭul thu a sawi.

ZPM Zonu chuan Aizawl Press Club-ah International Women’s Day an hmang a, ZPM Zonu president Sangzuali’n a kaihruai. An hun hmanpuitu ZPM leader Lalduhoma chuan, ram tana theihtawp chhuah zel turin hmeichhiate a chah.

Lalduhoma chuan, Assembly session neih mekah theihtawp an chhuah a, an thawhhona a ṭha tih sawiin, “Session kan neih mekah hian tih tur pawimawh tak tak kan la nei a, in mi ṭawngṭaipuina ka dil nghal a ni,” a ti.

ZPM Zonu-in International Women’s Day an hmannaah hian Mizoram University-a Department of Education-a professor Dr Lalbiakdiki leh Department of History & Ethnography assistant professor Dr Hmingthanzuali te pawhin thu an sawi a ni.

BJP, Mizoram Pradesh State Mahila Morcha pawhin an pisaah International Women’s Day an hmang a, an secretary Gracy Vanlalawmpuii Pachuau-in kaihruaiin, Mizoram BJP president Vanlalhmuaka’n a hmanpui.

Vanlalhmuaka chuan, “BJP chuan kan party an ni emaw, an ni lo emaw kan ngaihtuah lo a, hmeichhiate’n harsatna an tâwk a nih chuan an tan kan ding reng a ni,” a ti a; Narendra Modi-a sorkarin hmeichhiate a ngaih pawimawh avangin free gas connection leh ration card-ah hmeichhe hming dah hmasak a nih thu a sawi.

BJP Mahila Morcha hian mahni hna leh eizawnna lama hlawhtling hmeichhe pathum hnenah chawimawina an hlan a ni.