Sorkar hnathawkte'n hlawh An la tlai ziah bik lo - CM

Congress Legislature Party (CLP) leader Zodintluanga zawhna ziaka chhangin Finance changtu chief minister Zoramthanga chuan sorkar hnathawkten hlawh an lak tlai bik ziah loh thu a tarlang.

Chief Minister chuan tunhnai deuhah sorkar hnathawkte'n hlawh lak tlai ve hret chang an neih thu tarlangin, "Sorkar hnathawkte hian hlawh an la tlai ziah bik lo. Group C leh D hi chuan a hunah an la thei deuh zel a, group A leh B-te hian tlemin an la tlai deuh ṭhin," a ti.

Hlawh lak tlai chhan zawhna chhangin Zoramthanga chuan, "Covid-19 avangin ram pum economy a tlachhia a, state sum lakluh pawh a tlahniam a ni. Chutihrualin, he hripui leng dona kawnga ṭan lakna atan kum dang aiin thla tina sum hman ral a pung lawi si," a ti a, central-a sum hmuhna hnar ber post devolution revenue grant leh share of taxes dawn dan milin hlawh pek tlai hret hret a nih ṭhin thu a sawi.