Hripui vei hmuh zat a pung leh hret

March 7, Thawhṭanni khan Mizoramah Covid-19 vei mi 839 hmuh chhuah a ni a, hmuh zat leh positivity rate sang leh hretin, India ramah Kerala dawta hmuh tamna ber state a ni. Nimin khan hripui vei dam tawh mi 673 chhuahtir an ni a, hripui vangin mi pakhat a thi.

Thawhṭannia Covid-19 vei hmuh chhuahte chu mipa 349 leh hmeichhia 490 an ni a; RT-PCR hmanga hmuh 34, TrueNAT hmanga hmuh 53, RAT hmanga hmuh 746 leh FIA hmanga hmuh paruk niin, positivity rate 18.72% a ni.

Nimin khan hripui vei dam tawh mi 673 chhuahtir an ni a, district tina chhuak zat chu - Aizawlah mi 194, Mamitah 134, Lawngtlaiah 76, Serchhipah 75, Lungleiah 61, Saitualah 40, Siahaah 36, Champhaiah 33, Kolasib-ah 14 leh Hnahthialah mi pakua an ni.

IDSP record angin, Mizoramah Covid-19 vei 2,18,673 hmuh chhuah a ni tawh a, mipa 1,02,112 leh hmeichhia 1,16,561 an ni a, mipa aiin hmeichhia 14,449-in an tam zawk. Nimin tlai dar 5 thleng khan mi 2,14,473 (98.08%) chhuahtir an ni tawh a, mi 665 (0.30%) thi tawhin, enkawl mek mi 3,535 (1.62%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,18,673 chu mi 1,000 zelah hripui vei mi 199 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah March 7, 2022 thlenga swab sample endik tawh 18,54,137 aṭanga positivity rate chu 11.79% a ni a; RT-PCR hmanga endik zat percentage chu 20.05 a ni a, RAT hmanga endik zat chu 74.30% a tling.