Myanmar ráltlânte tan Mizoram Sorkarin nuai 380 a séng tawh

Home minister Lalchamliana chuan, Mizorama Myanmar ráltlânte tan Mizoram sorkarin cheng nuai 380 a sen tawh thu, ZPM member Lalduhoma leh INC member C Ngunlianchunga te zawhna ziaka chhángin a tarlang.

Home Minister chuan, Myanmar ráltlânte tana sorkar laipuiin hmalakna a neih leh neih loh zawhna chhangin, “Central sorkarin state sorkar hnenah kawng hrang hrangin sum a pe ṭhin a ni,” a ti.

Lalchamliana chuan, February 12, 2022 dinhmun angin, Mizoramah Myanmar ráltlân mi 24,289 an awm mek tih a tarlang a, “Ráltlânte hi a ṭhen sorkarin a ruahman refugee camp/shelter-ahte an awm a. A ṭhen chu khawtlangin camp a siamsakah an awm a, mahni chhungkhat laina hnaite bula khawsa bakah, in luahte pawh an awm a ni,” tiin a tarlang bawk.

C Ngunlianchunga zawhna a chhannaah Home Minister chuan, ráltlânte tana sum a sên tawh nuai 380 chu DC-te kaltlanga pek a nih thu a tarlang a, “Hemi hmang hian refugee camp-te sak a ni a, camp-a êng pawh luh nan te, tui dah khawlna tur lei nan te, ek-in (pit latrine) sak nan te, thawmhnaw lum, mutbu bakah sumfaia ṭanpuina atan te, medical care atana inenkawlna atan te, ei leh in atan te, refugee zinga MP leh MLA-te ṭanpui/chhawmdawl nate leh ráltlânte enkawlna tura DC-te hma lo lak tawhna sum mamawh phuhrûk nante a sem chhuak a ni,” a ti.