Telhâwng lei nan cheng nuai 30 hmang

Agriculture minister C Lalrinsanga chuan, kum 2019-20 khan telhâwng (elephant yam) chî lei nan Mizoram sorkarin SEDP hnuaiah cheng nuai 30 a dah a, telhâwng chíng turin Sangau khuaa mi 50 thlan an nih thu Assembly House a hrilh.

ZPM member Lalduhoma zawhna ziaka chhángin Agriculture Minister chuan, “SEDP hnuaia telhâwng chíng tur hian Sangau khuaa farmer 50 thlan niin, an vaia hmalakna zau zawng hi hectare 50-a zau a ni. Farmer-te’n a chìnna tur hmunhma buatsaih chu anmahni thâa thawkin, department chuan a chi leina tur cheng nuai 30 SEDP aṭangin a tumsak a ni,” a ti.

Agriculture Minister tarlan danin, telhâwng chî chu a chíngtute’n an khua leh an ṭhenawm khuate aṭangin an la khawm a, a chi kg. khat Rs 500-a leiin, SEDP aṭanga puihna cheng nuai 30 hmangin kg 6,000 lei a ni.

C Lalrinsanga chuan, telhâwng chu seng a la nih loh thu tarlangin, “Tun dinhmunah hian duhthusama a bul a la len ṭhat tâwk loh avangin seng a la ni lo a, chìn aṭanga kum 2-3 hnuah seng tum a ni,” a ti.