Hnahthialah zirna hmasawnna tur sawiho

Hnahthial District Education Committee, Samagra Shiksha chu nimin khan an chairman Vanlalmawia, bawrhsap hoin DC conference hall-ah an ṭhu a; zirna lama Hnahthial district hmasawnna tur an sawiho.

Vanlalmawia chuan, Hnahthial district tihchangtlunna kal zelah sorkarin tun hnaiah Hnahthial SDEO  chu DEO leh DPC, Samagra charge la tura tih a nih thu a sawi a, "Kawng hrang hrangah sorkar department-te district anga inrêlbàwlna a kal chho zel hi a lawmawm. District hi a lian emaw, a tê emaw, a nihna tur anga fel taka a kal hi a ṭha a ni," a ti.

Bawrhsap chuan, "Zirna kawngah hian mi tinin mawhphurhna kan nei ṭheuh a, khawtlang mipui ṭan rual a ngai," a ti a; Hnahthial chu tun hmain zirna lamah a hmingṭhat tawh ṭhin thu a sawi.

Samagra Shiksha DPC Micky Lalenkawla chuan, Samagra Shiksha kalphung leh hmalakna te, Education Development Evaluation & Granding Index-te a lem nen a sawifiah.

Ṭhutkhawmah hian sikul naupang chawchhun kalphung leh District Education Committee mawhphurhna sawiho a ni.