World Toilet Day hman a ni

Ministry of Jal Shakti hnuaia Department of Drinking Water and Sanitation chuan nimin khan video conferencing kaltlangin World Toilet Day pualin hun an hmang a; Jal Shakti minister Gajendra Singh Shekhawat-a'n  a hmanpui.

World Toilet Day hmannaah hian Swacch Bharat Mission (Grameen) hnuaia hmalaknate ngaihthlak a ni a, India ram puma a ti ṭha zual district 20 puan nghal a ni. District ti ṭha zual zingah Kolasib leh Serchhip district an tel.

Hun hmannaa an tarlan danin, Kolasib district-a thingtlang khua 34-ah PHE department-in community sanitary complex (CSC) a sa tawh a, Lungdai leh Rengtekawnah pahnih ve ve sak a ni. Swacch Bharat Mission (Grameen) hnuaiah Kolasib district-ah kum 2017-2020 chhungin mimal ek-in 2,057 sak a ni a, geo-tagging tih vek a ni.

World Toilet Day hmannaah hian Kolasib DC  Dr H Lalthlangliana, SBM(G) secretary H Lallianmawia leh PHE department hotute an tel a ni.