Hun tiamah Kolasib DEO a chhuak lo Kolasib NGO-te'n hmalak dan tur an rêl

Kolasib All NGO Coordination Commi­ttee-in Kolasib district election officer (DEO) Dr Arun T, district bawrhsap DC ni bawk chhuak tura hun an pek chu nimin tlai dar 5 khan a tawp a, DC hian Kolasib a chhuahsan lo. Kolasib NGO-te chuan an hmalak dan tur nizan khan an ngaihtuah a, an thutlukna kan hre hman lo.

Dr Arun T hian Tripura-a Bru camp-a Bru te, electoral roll-a thun dil, hearing-a an inlan loh vanga ERO leh AERO-te'n an lo hnâwl tawh mi 218 chu hearing nei lo leh document mumal lo hmangin electoral roll-ah a thun nia hriat a ni a; hei hi an duh loh avangin Kolasib NGO-te chuan November 12, Thawhṭanni khan November 13 tlai dar 5 hmaa chhuak turin Arun T chu an hriattir a ni.

Boruak awm dan thlithlai tur leh a ṭul anga palai hna thawk turin Aizawla NGO Coordination Committee hruaitute chuan Central YMA vice president R Lalngheta hoin nimin zing khan Kolasib an pan a, Kolasib-a Joint NGO hruaitute nen an inkâwm.

R Lalngheta chuan zawhna chhangin, Chief Secretary hoa official-te nena No­vem­ber 12, Thawhṭanni tlaia an meeting thuchhuak anga Kolasib pan ta an nih thu a sawi a, "Chief Secretary-in Kolasib NGO-te thil phût hi Election Commission of India (ECI) hnenah a thlen a, chumi chu ngaichâng turin kan duh che u a ni, tiin min hrilh," a ti.

Kolasib NGO hruaitute chuan, an thil phût chu ECI-in an duh chuan chawpchilh tak pawhin an tihhlawhtlin theih tih an hriat thu sawiin, ni li hnu pawha chhanna an hmu loh avangin Kolasib DEO kaihhruaina hnuaia inthlan hmanchhawn an duh loh thu an sawi an sawi a; Chief Secretary ngenna anga Aizawl aṭanga kal NGO Coordination Committee-te thu ken chu an pawm thei lo tih an sawi.

Aizawl aṭanga kal Joint NGO hruaitute leh Kolasib NGO hruaitute an inkawm zawhah Aizawla Joint NGO hruaitute chuan Kolasib DC Dr Arun T chu an kâwm a, mipui hmaa ngaihdam dil turin an hrilh. Dr Arun T chuan, ngaihdam a dil leh dil loh tur chungchangah ECI hotute a ràwn tur thu a lo sawi thung.

Kolasib DEO Arun T chuan, electoral roll-a dan dik loa thun a neih a hriat loh thu sawiin, "Dik lo a awm a nih chuan NGO-te'n PIL an thehlut a, chutah chuan a chiang mai dawn. Chubakah, ECI-ah lehkha thehluh a ni tawh a, ECI pawhin dan dik loa chhui electoral roll-a thun a awm leh awm loh an chhui ang a, dik lo a awm anih chuan delete leh mai tur a ni," a ti.

Dr Arun T-a'n Kolasib a chhuahsan loh avangin Kolasib NGO-te chuan nizan khan Diakkawn YMA Hall-ah meeting an ko a, Kolasib DEO chungchanga an hmalak dan tur an rel. Meeting-ah hian Kolasib All NGO Coordination Committee hruaitute bakah, Kolasib khawpui chhunga YMA, MHIP leh MUP branch tin office bearer-te leh Kolasib Sub-Hqrs. YMA huam chhunga YMA group office bearer-te tel tura tih an ni.

Kolasib boruak chungchangah hian Thawhṭanni zan khan chief secretary Arvind Ray hoin Chief Secretary conference hall-ah sorkar thuneitute leh NGO Coordination Committee hruaitute an ṭhukhawm a; meeting thurel angin Chief Secretary chuan ECI hnenah lehkha thawnin, Kolasib NGO-te duh dan a thlen a, a rang lama hma la turin a ngen a ni.