Congress sorkarin chhun ên laiin Mizoram mipui an rawk - MNF party

MNF party hruaitu ṭhenkhatte chuan nimin khan Aizawl Press Club-ah thuthar thehdarhtute kâwmin, Congress kaih­hruai sorkara eirukna awm nia an hriatte an tarlang a; chief minister Lal Thanhawla te unau leh super minister Zo­dintluanga ten chhun ên laiin Mizoram mipui an rawk niin an sawi.

MNF general secretary Zosangliana chuan, CM Lal Thanhawla'n ‘Kan eiruk sawi tur an hre lo’ ti fo mah se, MNF party-in vawi tam tak Congress sorkar eirukzia an sawi tawh ṭhin tih a sawi a, "Congress sorkar eirukna leh hlemhletnaa an inhnamhnawih thûkzia hi Zoram mipui hriatah kan puang nawn duh. Corruption-a kan ram a fihlim theihna tura step hmasa ber chu Congress sorkar hnâwl a ni," a ti.

Zosangliana chuan, CM Lal Thanhawla'n Kolkata New Town-ah ram neiin, in lian tak a sa tih sawiin, "A ram leh in hlut zawng hi Rs. 4,62,75,000 (nuai 462.75) a ni a, CM a nih chhunga a hlawh hi hmang miah loin khâwl vek mah se, he a in hi sak rual a ni lo ang," a ti. Kum 2012-13 leh 2014-15 inkarah Mizoram sorkarin lottery aṭanga sum a hmuh tur cheng vbc. 11834.22 a hloh tih sawiin, hei hi CM Lal Thanhawla leh lottery kalpuitute inthuruala thil tih vanga an ngaih thu a sawi.

Minister Lal Than­zara'n MLA/minister ni chungin Sunshine Over­seas-ah 21.6% chanvo a neih thu sawiin Zosang­liana chuan, chutih lai chuan MIzoram kawng a chhe hle niin a sawi a; an company HP Foods Product-in Congress sorkarah supply hna a hmu tam hle tih sawiin, "Minister/ parliamentary secretary aṭangin Pu Lal Thanzara’n a bàn phahna a ni," a ti.

MNF hotute chuan, Congress sorkarah Mizo zirlai 32-te Kolkata-a zirna-in lem, NIAS-ah sum tam tak senga tirh an nih avangin Labour Employment & Industrial Training minister Lalrin­mawia Ralte chu minister aṭanga a bân phah thu leh Mizoram Youth Commission chairman T Sangkunga, MLA pawh a ban phah thu an sawi.

Zosangliana chuan, kum 2012-ah Taxation minister Zodintluanga nupui laizawnnu Dr Margaret M Varte leh Ravi Gulgulia te hmingin M/s Mizo Carbon Products Industry din a ni tih sawiin, "Zo Carbon-in subdidy an dil angin an hnenah hian Central Capital In­vest­ment Subsidy Rs. 93,90,­361 leh Central Tran­sport Subsidy Rs. 2,47,74,725, a vaiin Rs. 3,41,65,086 chu tu emaw chuan a fanghma no ei, a account-ah a dah daih a ni," a ti.

Dihmunzawlah 132 KV sub-station leh trans­mission lian siam hna thawhna atan PHE building hlui lian lo tak pakhat leh water tanky pahnih ṭhiah nan cheng nuai 63,08,504 hman a nih thu leh lei laih nan uchuak taka tam sum dah a nih thu an sawi a; chu'ng bak pawh chu Dihmunzawlah eirûkna tih chiang a la awm nual niin an sawi a ni.

MNF hruaitute chuan, UDPA minister Zodin­tluanga enkawl SIPMIU-in Aizawla hmun 10-ah vantlang êk-in uchuak taka to leh chhe taka an sak thu te, SIPMIU-in bawlhhlawh paih motor to uchuak taka an lei thu te, SIPMIU hna dangah eirukna a awm ngei nia an hriat thute an sawi bawk a; "Pu Lal Thanhawla leh a nau Lal Thanzara leh, minister Zodintluanga te hian chhûn ên laiin mipuite min rawk a, eiru pawh niin an lang lo, an ei lang a ni," an ti.