Chakma leh Bru an pun chak chhan Vote bank atan an duh vang - ZPM

Zoram Peoples' Movement (ZPM) Val Upa Council chuan nimin khan Kolasib Press Club-ah thuthar thehdarhtute an kâwm a; Mizorama Chakma leh Bru an pun chak chhan chu Mizorama sorkar ding tawhte'n an ngaihthah vang leh vote bank-a an duh ṭhin vang a nih thu an sawi.

ZPM Val Upa Council (VUC) chairman Lalfakzuala chuan, "Mizorama Chakma leh Tuikuk an tam nachhan chu, sorkar awm tawhte’n an ngaihthah vang leh vote bank atana an duh avang a ni. ZPM a sorkar chuan ram damna leh himna kan ngai pawimawh dawn a, kalphung tharin ram kan hriai dawn a ni," a ti.

Lalfakzuala chuan, ram leh hnam himna chu NGO ngaihtuah tur a nih loh thu sawiin, "Sorkar tih tur leh mawhphurhna a ni," a ti a; ZPM a sorkar chuan kalphung thar, mipui sorkar leh dan lalna ram an siam dawn thu a sawi.

ZPM VUC Chairman chuan, Val Upa Council chu thuneitu tura din a ni lo a, sorkar uap tur, sorkar inluling tur vengtu atana din a nih thu a sawi a; sorkarin manifesto an tihhlawhtlin leh hlawhtlin loh viltu tur, ZPM-te an thutiama an din leh din loh thlirtu tur, sorkar hmalaknaa thurâwn petu tur a nih thu a sawi bawk.