EVM strong room siam tam vangin CAPF mamawh zat a pung nasa

Mizoram Joint Electoral Officer (Joint CEO) Zorammuana chuan, inthlan hmasa lam aiin kumina Mizoram inthlanpui neih turah nasa taka strong room a tam zawk avangin central armed police force (CAPF) mamawh zat pawh nasa takin a pung tih a sawi a; tunah chuan state pawn aṭanga CAPF hruai luhna turah harsatna a awm tawh loh thu a sawi bawk.

Vanglaini palai zawhna chhangin Joint CEO chuan, Mizo­ram Assembly inthlan hmasaah vote chhiar chhung a rei a, pawl hrang hrangin an ngaimawh thu an sawi tih a sawi a, "Counting a rei chhan hi counting hall a tlem vang a ni. Kuminah chuan counting hall a tam tawh a, Assembly bial hrang hrangte tan counting hall hran siam a ni a, strong room 40 a awm tawh a, a vengtu tur pawh kum hmasa aiin kan mamawh tam ta hle a ni," a ti.

Joint CEO-in Vanglaini a hrilh danin, kum 2013-a Mizoram Assem­­bly inthlanah CAPF compa­ny 25 chah luh a ni a, kuminah chuan company 40 chah luh a ni. Inthlanna atana hman vote thlakna electronic voting machine (EVM)-te dahna strong room chu CAPF-te'n an ven ngei a ngai a, state police-te ventir phal a ni lo. Kuminah hian Assembly constituency pakhata EVM-te chu CAPF platoon pakhat zelin an ven a ngai a; chuvang chuan kumina inthlan turah hian CAPF mamawh zat a tam phah a ni. Police/sipai platoon khatah hian mi 30 vel an awm tlangpui.

Zorammuana chuan, NGO Coordination Committee-in Mizo­ram hmun hrang hranga Hnam Hnatlang an huaihawt lai velin state páwn aṭanga CAPF hruai luhna turah dodalna awm mah se, tunah chuan dodalna thawm a awm tawh loh thu a sawi a, "Tunah chuan har­satna kan nei tawh rih lo," a ti.

Kolasib-a All NGO Coor­dina­tion Committee-in Kolasib DC leh DEO Dr Arun T chu November 13, Thawhlehni ral hmaa Kolasib chhuahsan tura an hriattir chung­changa Election department hmalakna dan zawhna chhangin Joint CEO chuan, tih theih an neih tam loh thu a sawi a, "Phone aṭangin kan tih theih ang ang kan ti ve a, an thu sût tura ngen hi kan tih theih chu a ni mai," tiin a sawi.

Joint CEO chuan, Mizoram inthlan hun pangngaiah inthlan loh palh a hlauhawm ber tih sawiin, inthlanna tisukuk thei zawnga che lo turin mi tin a ngen a, "Inthlan loh hi tu tan pawh a ṭha lo. Political party-te tan a ṭha lo a, sorkar tan pawh a ṭha lo a, sum tam tak an sêng tawh. Mizoram tan hrim hrim pawh inthlan loh hi a ṭha lo a ni," a ti.