KHAWTHLIR

Observer-in enfiah
Mizoram Assembly inthlan awm tura Lunglei district atana Election Commissioner of India-in general observer atana a ruat NS Prasanna Kumar, Chakravarthi Mohan leh Armstrong Pamei te chuan an bial chhunga khaw hrang hrangte an tlawh a, inthlanpui awm tur atana inbuatsaihna hrang hrangte an enfiah.

Duty tur sem rual
Nimin khan Champhai district-a constituency pangaa duty turte sem rualna (randomization) hun Champhai DC office-a NIC conference hall-ah buatsaih a ni a; computer hmangin polling station 137-a duty tur polling official mipa 664 leh polling party tur team 178 chu sem rual a ni.

In kâng
Nimin chawhma dar 11 vel khan Sàwleng Chhimvengah Assam type in pakhat, chhungkaw pahnih luah lai chu a kâng a, bungrua chuh hman lohin a kâng ral. Thu dawn danin, in hi Tlangruali in a ni a, ama'n a luah bakah, a hnuai chu a fapa Lalduhsaka ten an luah a ni. In luahtute hi kângmei a chhuah laiin inah an awm lo ve ve a ni.

Inthlan sawiho
Lunglei district tana police observer Sangakal Veeresh Prabhu chuan November 12, Thawhṭanni khan Lunglei district-a police officer-te SP conference hall-ah a kokhawm a, Mizoram inthlanpui awm tura venhimna chungchang a sawipui. Police Observer chuan, MLA inthlan lo awm tura Lunglei SP leh a hoten hma an lo lak tawh chu a enpui a, a lungawi thu a sawi.

Painting competition
SCERT hnuaia Environmental Orientation to School Education Cell chuan nimin khan SCERT conference hall-ah 'On the Spot Painting Competition' an buatsaih a, sikul 15 aṭangin zirlai eng emaw zat an tel. Inelnaah hian pakhatna chu C Laltlansanga, Zonuam Middle School a ni a, pahnihna leh pathumna chu - RK Lalhmangaihzuala, Armed Veng M/S leh VL Hriatpuia, Comprehensive Model School-te an ni.