Lawngtlaiah ni 5 chhung partial lockdown

Lawngtlai District Level Task Force on Covid-19 nimina an chairman, DC Dr Andrew H Vanlaldika hoa ṭhukhawm chuan, Covid-19 darh zel tur venna atan Lawngtlai khawpui leh district khaw ṭhenkhatah ni nga chhung partial lockdown neih an rel.

Dr Andrew H Vanlaldika chuan Covid-19 hri leng kaihhnawiha an district dinhmun tlangpui tar langin, "Kan district chhungah vantlang zinga hri kai hmuh chhuah belh zel a nih avangin leh Lai Autonomous District Council (LADC) Inthlanpui hmachhawn mai tur a nih avangin hri leng laka kan district a him theih nan hma lak dan tur ngaihtuah a ṭul a ni," a ti.

LADC inthlanpui lo awm turah inthlan thil kal mek tam tak a awm avangin a kaihhnawih tel political party-te pawh meeting-ah sawm an ni. Political party, Central YLA lam leh Chief Medical Officer aṭanga thu sawi ngaihthlak a nih hnuah member-te sawi hona aṭangin, Lawngtlai khawpui chhung leh district chhung khaw ṭhenkhat, vantlang zinga hri kai hmuh chhuahnaahte ni nga chhung partial lockdown neih hi an rel a ni.