Hel kan thawhpui ve dawn lo - Congress
Congress party chuan thuchhuah siamin, kumina Mizoram inthlanpuiah hel an thawhpui loh tur thu leh helho chakna hmanga vote zawn an tum loh thu an tarlang.
Nimina MPCC thuchhuah chuan, hel hmanga invauna leh inrîkrâpna thleng ṭhin chu Mizoram mipuiin an ning tawh a, kalsan an duh tawh tih sawiin, "MPCC chuan 2018 MLA General Election-ah helho chakna hmanga vote zawn a tum lo a, inthlanna felfai leh thianghlim tak a awm theih nan hma a la reng ang," a ti.
MPCC chuan, Central YMA hruaitute'n tun hnaia MNF pisa, Mizo Hnam Rûna an lên chilhnaah inthlanna dik leh thianghlim a awm theih nan hma an laknaah, Manipur helte biaa an kal hial tawh thu an sawi chu ṭha an tih thu an sawi a, "Tun hnaia Bru Revolutionary Army inti, Zarzokima thah a nih ṭuma an hotupain Chhimluanga vantlang inkhawm koin, Bru-te chu MNF vote turin a hrilh thu an sawi chhuak a ni," an ti a; helho chetna awm thei chu ṭhelhmih theih a nih laia hmetmih a ṭul thu an sawi.
CYMA hruaitute nena an inkawm ṭumin MNF president Zoramthanga'n, sorkar nena inrem ve lo HPC(D)-in Mizoram an rawn hnaih thu a hriat te, Assam-a Bru underground-te an rawn inzuar ṭhin a, an sum duhin public meeting an rawn ti ve ringawt thei anga a sawi theih aṭangin, MNF party chauh chu hel inlêng nei an ni tih a hriatthiam theih niin MPCC chuan an sawi a, "Kum thum chhunga intodelh min tiamtu, Chakma Autonomous District Council ṭhiah tum tawhtute thu leh hla hi mipuite'n awih sak chi-ah kan ngai lo," an ti.