Kolasib-ah Hnam Hnatlang neih a ni ; Court-in insawifiah turin Dr Arun T a ko

Tripura relief camp-a Bru-te dik lo taka Mizoram electoral roll-a thuna an puh, Kolasib district election officer (DEO) Dr Arun T chu Kolasib aṭanga chhuak tura nawr nan Kolasib All NGO Coordination Committee chuan nimin zing dar 8 aṭang khan Kolasib-ah Hnam Hnatlang an huaihawt a, buaina lian tham a chhuak lo. Hetih lai hian, Gauhati High Court, Aizawl Bench chuan Dr Arun T chu insawifiah turin a ko.

Kolasib-a Hnam Hnatlangah hian nimin zing dar 6 aṭangin Kolasib DC pisa bulah mipui an pungkhawm a, Dr Arun T an duh lohna thuziak hrang hrang an keng. Hnam Hnatlang avang hian Kolasib-a pisa leh zirna-in zawng zawng khâr vek a ni a, Kolasib DEO Dr Arun T leh DC pisaa thawk dangte pawh pisa an kai lo.

Aizawl aṭanga kal Mizoram Kohhran Huriatute Committee (MKHC) hruaitute leh Kolasib NGO Coordination Committee hruaitute chu nimin chawhma dar 11:30 khan Kolasib Circuit House-ah an inkâwm a; MKHC hruaitute chuan, Kolasib mipui lungawi lohna chu ram pum huapa lungawi lohna a nih thu sawiin, "Inthlan tibuai lo zawnga lungawi lohna kan lantir a ngai a ni. Inthlang loa kan awm hian Mizo mipui tan chhiatna nasa zawk a thleng thei a ni," tiin an thlêm a ni.

MKHC hruaitute nen an inkawm hnuah Kolasib NGO hruaitute chu an ṭhukhawm nghal a; MKHC hruaitute ngenna chu zahawm an tih avangin

Hnam Hnatlang chu chawlh lailâwk an remti a, nimin tlai dar 3 khan an titawp lailawk a ni. Mipui an ṭîn darh hmain DC office gate bulah Dr Arun T lim/thlalak an hâl a, chumi hnuah mipui an ṭîn darh.

Dr Arun T-a'n hearing awm lo leh document rintlak loh hmangin Tripura relief camp-a Bru mi 218-te Mizoram electoral roll-ah a thun nia hriat vanga Gauhati High Court, Aizawl Bench-a PIL thehluh chu nimin khan ngaihtuah a ni a; Court chuan electoral roll chu November 19, 2018 thleng a stay a, Dr Arun T chu November 19-a insawifiah turin a ko.

Kolasib NGO Coordination Committee hmalakna vanga buaina thleng thei veng turin Kolasib hi IGP LH Shanliana, DIG (Northern Range) Lalbiakthanga Khiangte, DIG (Training) Joseph Lalchhuana leh AIGP C Lalzahngoa ten an awmchilh a ni.