Inthlan turah mi 3 an inhnûkdâwk ; Inthlanah candidate 209 an awm dawn

November 28, 2018-a Mizoram Legis­lative Assembly inthlan atana inhnuhdawh hun chu nimin tlai dar 3 khan a tawp a, hriat theih chinah Aizawl district-ah mi pahnih leh Lawngtlai district-ah mi pakhat, an vaiin mi pathum an inhnûkdâwk. Heti hian, Mizoram Legislative Assembly General Election 2018-ah hian candidate 209 an awm dawn ta a ni.

Mizoram Election department-a deputy chief electoral officer H Lianzela'n Vanglaini palai zawhna chhangin, nimin tlai dar 6 thlenga an hriat theih chinah Mizoram inthlan­pui atana chuh tura hming pe lut zingah inhnûkdâwk mi pathum an awm thu a sawi.

Deputy CEO H Lian­zela sawi danin, nomi­naton thehlut tawh zinga inhnûkdâwk lehte chu - constituency no. 14-na Aizawl East-II biala PRISM candidate Lalenkima Khiangte leh Zoram Thar candidate Lallawmzuala Sailo te, constituency no. 37-na, Lawngtlai West-a biala ZPM hminga inde­pendent-a din tum N Lalmama te an ni. Heng mite dilna hi an bialtu returning officer-te chuan an pawmsak a ni.

Hetih lai hian, Ha­chhek bialah Bru candi­date an dah dawn nia hriat vanga Hachhek NGO Coordination Committee-te'n party dang zawngte tana common candidate tura an thlan J Lalsailova chuan nimin khan Mamita Returning Officer hnenah inhnuhdawh a dil a; mahse, dan anga thil kalpui a nih loh avangin a dilna pawm a ni lo.

J Lalsailova hian Hachhek biala NGO-te ngenna angin inthlan chu turin hming a pe lut a, mahse, BJP-in Bru candidate dah loin, Mizo an dah tak avangin nimin khan inhnudawh a tum a ni. Returning Officer chuan, J Lalsailova hnen aṭangin inhnuhdawh dilna an dawng tih a sawi a, "Mahse, dan an zawm tluan loh avangin a dilna kan pawm thei lo a ni," a ti.

Returning Officer sawi danin, inhnuk­dâwk tur hian form-5 hmangin dilna thehluh a ngai a, candidate a kal lo a nih pawhin, election agent atana hming a ziah lan tu emaw tal a inlan a ngai. J Lalsailova hian inhnuhdawh a dilnaah hian amah emaw, a election egent emawte Returning Officer hnenah an inlan lo vek a, hei vang hian inhnuhdawh a dilna chu RO chuan a pawm thei ta lo a ni.

Pawl hrang hrangin candidate an neih zat Vanglaini-a lo tarlan tawhah, ZPM candidate ṭhenkhat tarlan hmaih a ni a; ZPM hian an candidate tur mi 35 an lo puan tawh bakah, mi dang pathum - Lawngtlai West-ah N Lalmama, Lawngtlai West-ah MC Lalramchhana leh Saiha-ah F Thangchhuaha te an neih belh. Hetih lai hian, N Lalmama hi nimin khan a inhnûkdâwk leh thung.