Congress leh MNF party-te'n an flagship programme an hlawhchhampui - Lalhmangaiha

Zoram Peoples' Movement (ZPM) leader Lalhmangaiha Sailo chuan, Congress leh MNF party-te chuan an sorkar laiin an flagship programme an hlawhchhampui ve ve niin a sawi a, kalphung thar hmanga ZPM-in ro an rêl a, MNF leh Congress paihthlak an nih theih nan Mizoram mipuite thawhpuiah a sáwm.

Nimina Aizawl West-II bial chhung, Vaivakawna ZPM Information Office a hawnnaah thu sawiin Lalhmangaiha Sailo chuan, "Kan rama roreltu party pahnihte'n an flagship programme an hlawhchhampui ve ve. Khawi ram mahin therhlo sem avangin an ram an khaichhuak ngai lo a, rethei leh hausate inkar a tizau a, rilru, taksa leh thlarau thlengin a chhe lamin a nghawng a ni," a ti.

Lalhmangaiha Sailo chuan, Congress leh MNF sorkar ding tawhte chu ramri buaina chingfel thei lo-ah puhin, "Zirlai pawl leh NGO-te awm lo phei se chuan kan ram hi ngaihtuahawm tak a ni ta. Kohhranho ṭawngṭaina leh mipuite ṭanrualna avangin kan hnam hi a la kal hram hram a ni," a ti a; inchîm ralna pawiti loa Chakma candidate neiah party dangte chu puhin, Mizo hnam leh sakhaw kal zelna atan thil pawi tak a la nih tur thu a sawi.

Mizozam pumah ZPM bo­ruak lian mek zel nia sawii Lalhmangaiha chuan, "Pathian malsawmna a ni. Kan political system thlak ngam tur leh ngaihtuahna thar nei a, mipui sorkar dik tak din a nih theih nan Zoram mipui zawng zawngte thawhpuiah ka sawm che u a ni," a ti.

Rev. Robawia pawhin thu sawiin, ZPM-in mi thar an lawm lut ve ngai lo a, mipui huap movement a nih avangin mi hlui leh thar an awm lo tih a sawi a, "Kan ram, kan hnam leh sakhua a nghîng a, a tidam turin Zoram mipuite hi ṭawngṭaina nen tih tak zetin i thawkho ang u," tiin, ZPM tana thawhpuiah Mizoram mipui a sáwm a ni.