Naupangte Ni pualin hun hman a ni

Nimin November 14 kha Naupangte Ni (Children's Day) a ni a, Aizawl leh Mizoram hmun dang ṭhenkhatah hman a ni. Aizawlah chuan Governor Kummanam Rajasekharan hoin Raj Bhavan multipurpose hall-ah sikul naupangte nen an hmang a; Governor chuan, nakkum aṭangin state huap leh district huapa naupang thlan chhuahte hnenah Governor's Trophy hlan a nih tur thu a puang.

Larsap chuan, Mizorama naupang zawng zawngte chu duhsakna chibai bûkin, "Naupan lai chuan suangtuahna hrang hrang leh puitlin huna nih tum hrang hrangte'n rilru a luah ṭhin. Mi hlawhtling ni tur chuan ngaihtuah tam a ngai a, naupang lai aṭangin suangtuahna ropui tak tak leh tum sang tak tak neih a pawimawh a ni," a ti.

Zirlai nih hun hman thiam a ngai tih sawiin Governor chuan, "Ṭan lak hun a nih angin rim taka hna thawk ṭhinte chu mi puitling, hlawhtling tak takte an ni ṭhin a, mi hlawhchhamte hi kan belhchian chuan harsatna paltlang ngam lo te, vawi hnih khat tih fuh loh vanga beidawng ṭhinte an ni," a ti a; zirlai leh naupangte chu ram leh hnam nghahfâk, leilung hausakna tinrengte la rochungtu turte an nih thu a sawi.

Children's Day hmanna inkhawm hi Governor secretary K Lalthawm-mawia'n a kaihruai a, School Education secretary Esther Lalruatkimi'n fuihna thuchah a sawi.

Naupangte leh Governor inkawmna hunah hian Aizawl khawpuia sorkar middle school 10-a zirlaite an tel a, sikul tina aiawh ṭheuhte chuan Governor hnenah zawhna pakhat ṭheuh an zawt a ni.

Social Welfare department leh Eternity Partners pawhin Children's Day hi City Park-ah an hmang a; childrens home hrang hrang leh sikul hrang hrang aṭangin naupang ṭhahnem tak telin, intihhlimna chi hrang hrang an buatsaih.

Children's Day hi khawvel ram hrang hrangin an hman hun a inang lo a, India ramah chuan prime minister hmasa ber Jawarharlal Nehru pian champha November 14-ah kum 1965 aṭangin hman ṭan a ni.