ZPM tan káwl a êng - ZPM

Zoram Peoples' Movement (ZPM) chuan thu-chhuah siamin, facebook-a group lian ber Mizo Special Group-in mipui rin dan an laknaah leh Cognizant Technology Solution, Bangalore-in mipui ngaih dan a lakna (opinion poll)-ah ZPM an sang ber ve ve niin an tarlang a, "ZPM tan káwl a êng a, Zoram tluanah ZPM thlifîm a tleh mek an ni," an ti.

ZPM thuchhuah tarlan danin, Mizo Special Group-in tun hnaia mipui ngaihdan an laknaah vote 5,269 a tla a, ZPM-in 3,174 an hmu. MNF-in 1,389, INC-in 510, BJP-in 98 leh PRISM-in 98 an hmu thung. Assembly seat 40 zinga MLA seat an pek dan chu - ZPM - 30, MNF - 7, INC - 1, independent - 1 leh draw - 1 a ni.

Cognizant Technology Solution-a mi Er. Lawmnakima'n Facebook leh Whatsapp hmangtute zinga opinion poll, kumin November chawlhkar hmasa bera a lakah vote 6,018 zinga 3,067 chu ZPM-in an hmu a, MNF-in 1,693 leh INC-in 912 an hmu a ni.

ZPM chuan, Mizoram páwna Mizote pawhin ZPM tan ṭhahnem an ngai hle nia sawiin, "USA, Japan, England, Denmark, Singapore, Israel, India, Nepal, Canada leh Germany-a Mizo chhungkuate'n tanpuina an rawn pe a, lawmawm kan ti hle. NGO leh neutral mipui tam tak pawh sorkar kalphung thar leh danglam din duhin ṭha-hnem an ngai hle niin kan hria a, lawmawm kan ti tak zet a ni," an ti a; Pathian leh mipui duhsakna azarah ZPM-in sorkarna a chan ngei an beisei thu an tarlang.