MZP-in Congress party hotute kâwm

MZP hruaitute chuan political party hrang hrang hruaitute an kawmna kal zelah a tawpna atan November 13, Thawhlehni khan Congress Bhavan-ah lêngin, MPCC vice president CL Ruala leh hruaitu dangte nen an inkâwm. MZP president L Ramdin-liana Renthlei chuan, ramri, zirna, Chakma foreigner leh Lokayukta chungchanga MPCC hmalak tum dan leh hmachhawpte a zâwt a ni.

CL Ruala chuan, Mizoram state boundary mai ni lo, international boundary thlengin Chief Minister hnenah Mizoram MP pahnihte'n an sawipui tawh tih sawiin, "Assam hian hmarchhak state dangte nen ramriah buaina an nei vek a. Mizoram MP-te'n Assam CM pawh an sawipui tawh a, Assam CM chuan Mizoram leh Assam ten ramri buai an neih loh thu leh a hriat loh thu a sawi a ni," a ti a; Congress a sorkar leh a nih chuan Boundary Commission an din niin a sawi.

MPCC hruaitute chuan, Education Service Rules an duan mek thu sawiin, "He Rules hmang hian zirtirtu lak leh Mizoram hmun hrang hranga zirtirtu indaih lohna chu nasa takin a su­kiang dawn. MPCC chuan The Mizoram Rural Local Govrnment (Panchayat) Bill, 2018 a duang bawk a ni," an ti a; zirlaite tan study tour an buatsaih ṭhin dawn nia sawiin, "Thingtlang lama zirtirtu tan quarters sak dan tur ruahmanna kan duang bawk," an ti.

Chakma foreigner chung­changah MPCC hruaitute chuan, ‘Mizorama Chakma foreigner pung chak lutuk chu MPCC-in pawi an tih thu sawiin, "Chakma zingah hnam pêng chi hrang hrang an awm a, chu'ngte chu an inngeih bik vek lo," an ti a; MPCC chuan rilru fîm tak leh ngaihtuahna zau zawk pûin Chakma hnam chi pêngte ṭhen darh dan tur an ngaihtuah niin an sawi.

Congress party hruaitute chuan, Lok Ayukta chu Congress sorkarah Assembly House-ah MLA-te'n hman an rél tawh tih sawiin, "Mizoram sorkar chuan chak taka hma la nghalin, tunah hian hman mai theih tura peih a nih bakah, office hmun tur leh hnathawkte pawh neih vek tawh a ni. Mizoram Assembly inthlan zawh veleh hian hman theih tura engkim ruahman tawh a ni," an ti.