World Diabetes Day hman a ni

Nimin kha World Diabetes Day a ni a, Aizawlah pawh Civil Hospital conference hall-ah National Porgramme for Prevention & Control of Cancer, Diabetes, Cardio-Vascular Diseases & Stroke (NPCCDS) leh Mizoram Diabetic Society (MDS) ṭangkawp bultumin hman niin, Health & Family Welfare principal director Dr F Lallianhlira khuallian a ni.

Dr F Lallianhlira chuan, zunthlum natna chu ngun taka enkawl a ngai tih sawiin, "Ei leh inah fumkhur a ṭul a, zûk leh hmuama insûm leh taksa sâwizawi ṭhat a pawimawh hle. Kan nun dan dik loh vanga hluar a ni. Zunthlum natna veite hi an chhungte'n an enkawl a ngai nasa a, damlo aiin chhungte an buai ṭhin hle a ni," a ti.

Kum upat hnuah chuan hriatrengna a ṭha lo telh telh a, damdawi ei leh inenkawlna kawngah chhungte pawimawhna a zual zel tih sawiin Dr F Lallianhlira chuan, "Hei vang hian zunthlum natna chungchangah pawh damlo leh an chhungte tan inhrilhhriatna kan uar zel a ngai," a ti a; zunthlum natna chu rilru hah nen a inhmeh loh thu a sawi.

Inkhawm hi Mizoram Diabetic Society (MDS) vice president Dr Zohmangaiha'n a kaihruai a, NPCDCS state nodal officer Dr Eric Zomawia'n 'The Family Diabetes' tih thupui a sawi. MIMER-a assistant professor Dr PC Lalramenga'n zunthlum natna lan chhuah dan, finfiahna leh a kaihhnawih natnate a sawifiah.

World Diabetes Day hi kum 1991-ah hman ṭan a ni a, Mizoramah chuan kum 2014-ah hman ṭan a ni. Tun dinhmunah khawvel pumpuiah mi nuai 4250 vel zunthlum natna vei mek anga chhût a ni a; kum 2014 aṭanga 2018 chhung-in Mizorama district hrang hranga NPCDCS centre-ah inentir mi 3,58,725 awmin, chu'ng zinga 41,778 chu zun­thlum natna vei tih hmuh chhuah a ni.