Mizoramah tualṭo party tluchhe tawh an dingchhuak leh ngai lo - Zodintluanga

Congress party-a Campaign Committee chairman Zodintluanga chuan, Mizoramah tualṭo party tluchhe tawh an dingchhuak leh ngai tawh lo nia sawiin, MBF pawh an tlukchhiat tawh avang­in an dingchhuak tawh dawn lo niin a sawi.

Zodintluanga hian nimin khan Thorang biala Thénhlûm khuaa vantlang inkhawmah thu sawiin, "Regional party tluchhe tawh MNF party hi Mizoramah mautâm avanga din a ni a, mautâm bawkin a her liampui tawh. Eirûkna avangin mipuiin an hnâwl tawh a, regional party lo tluchhe tawh Mizo Union leh PC party-te angin a tluchhe hlen ve tawh a ni," a ti.

MNF chu khaw hrang hrangah kal thuak thuakin dâwt thuthang siamin, a tak awm lo, a thu chauhin mi an lâwm lut thuak thuak nia sawiin Zodintluanga chuan, "An mi leh sate chhuak mai tur up beh nan a mihringa awm si loin dâwtin mi an lawm lut a, chu chu an thehdarh a, a taka fin-fiahin a tak a lo awm ngai si lo," a ti a; Congress chuan chal pen ngam chauh an lawm lût ṭhin niin a sawi.

Zodintluanga chuan, MNF chu Congress sorkar sawiselna hre loah puhin, "Mizoramah term hnih a sorkar theih loh' tih thu hmangin Congress an sorkar tawh dawn lo tiin an campaign a. Congress hian record siamin term thum kan sorkar dawn a ni," a ti.