ZPM-te independent candidate vek an ni - MPCC

Congress party-a Media department chairman Lallianchhunga chuan nimin khan Aizawl Press Club-ah thuthar thehdarhtute kâwmin, ZPM candidate-te chu independent candidate an nih avangin thlan tlin an nih pawhin, sorkarna siam tum BJP tan lei an awlsam bik dawn niin a sawi.

Lallianchhunga chuan, pawl hrang hrang, candidate nei zingah PRISM, NPP leh NCP-te chuan an party candidate-te tling vek pawh ni se, party malin sorkarna an siam thei lo tih a sawi a, "ZPM tum ber chu Congress tel lo, MNF tel lo sorkar siam a ni. Hei hi thil thar a ni lo a, tuna ZPM kuah khawmtute’n inthlan a awm a pianga an lo tih fo tawh, an la hlawhchhampui ziah tho kha a ni," a ti.

ZPM chu politics-a pawl pakhat, an din tirha mipuiin beiseina sang tak nena an thlir a nih laiin, nomination an thehlut a, independent angin an ding ta vek tih sawiin Lallianchhunga chuan, "Tling vek mah se, sor­karna siam pha chuang lo tur, mahse, pawl hminga bial 15 lai chuh thei PRISM party pawh an tluk ta lo a ni," a ti.

MPCC Media Chairman chuan, kumin inthlanpuiah BJP-in Mizoram khawthlang lama Assembly bial panga tal lak tumin an thawk mek nia sawiin, "Mizoram rawn tlawh tawhtute leh la rawn kal tum an hruaitute an hrawl hlawm hle. State khawpui Aizawlah chám loin Chakma leh Tuikuk tamna hmun lam an pan chat chat zel a ni," a ti a; Bru leh Chakma tamna hmunah duh tawkin sum hmangin voter an thunun theih a rinawm niin a sawi.

Independent-a thlan tlinte chu political party inkaihhruaina (discipline) nei lo an nih avang­in an zalen tih sawiin Lallianchhunga chuan, "Independent-a thlan tlin an nih hnuah political party an zawm chuan ‘disqualify’ theih ni mah se, an duh party an ­thláwp thiang thung," a ti a; chuvang chuan, independent-a MLA chuhtute chu venthawn an ngai zual niin a sawi bawk.