Vice President a rawn zin ; House-ah thu a sawi dawn

Vice president M Venkaiah Naidu chu zan hnih riak turin nimin khan Aizawl a rawn thleng. Vawiinah Assembly House-ah thu a sawi dawn a, Zirtawpniah Mizoram a chhuahsan ang.

Vice President hi Lengpui Airport-ah Governor Hari Babu Kambhampati, minister Dr R Lalthangliana, Rajya Sabha MP K Vanlalvena, chief secretary Dr Renu Sharma, DGP Devesh Chandra Srivastava, Assam Rifles DIG Brig. Digvijay Singh leh sorkar official dangte'n an lo dawngsawng a, Raj Bhavan-ah deputy chief minister Tawnluia hoin lo hmuah a ni bawk.

M Venkaiah Naidu hian Raj Bhavan-ah chief minister Zoramthanga a kâwm nghal a, thil pawimawh hrang hrang an sawi dun. Chief Minister chuan, all India service cadre chungchang Vice President hnenah a thlen a ni.

Zoramthanga chuan, Mizoram chu kum 30 chuang state ni tawh mah se, all India service-ah cadre hran a la neih loh thu a sawi a, "Hei hi ngaihven ngai tak a ni. Inrêlbâwlna ṭha zawk nei turin cadre hran state-in neih a mamawh," a ti.

Chief Minister hian Vice President hnenah hian Myanmar buaina avanga sahimna zawnga Mizorama rawn lutte Mizoramin a lo bâwihsâwm dan pawh a sawipui a ni.

Governor chuan nimin tlai khan Venkaiah Naidu pual hian Raj Bhavan-ah cultural programme a buatsaih. Vice President hian naktuk zingah chief minister Zoramthanga hoin council of minister-te nen Raj Bhavan-ah thingpui an inho ang a, chawhma dar 10:30-ah Assembly House-ah thu sawiin, chumi hnuah Raj Bhavan-ah mi pawimawhte a kâwm dawn.

M Venkaiah Naidu hi zaninah Raj Bhavan-ah a riak leh dawn a, zing dar 7:40-ah Mizoram chhuahsan turin Lengpui Airport a pan dawn a ni.