Politics-a hmeichhe dinhmun zirho

Aizawl Municipal Corporation (AMC) ward IX-XIX huam chhunga local council member hmeichhiate tan nimin khan 'She is a change-maker for women in politics' tih zirhona SIRDPR-ah buatsaih a ni a, Women & Child Development director Lallianpuii'n a hawng.

Lallianpuii chuan, politics-ah hmeichhiate'n hmasawnna tur leh tih tur an nei tih an hriat reng a pawimawh tih sawiin, "In chhungah fate kan enkawlna kawngah kan fimkhur a, mipa leh hmeichhia enkawlna kawngah a bik awm loa inang tlanga enkawl ṭhin a pawimawh," a ti a; politics-ah Mizo hmeichhiate'n danglamna an thlen thei tih hriaa hmasawn zel turin a fuih.

Mizorama MLA zingah hmeichhia an awm lo tih sawiin Lallianpuii chuan, "Ṭan kan lâk a ngai hle. Hmeichhiate cháwi sánga humhalh leh hmasawn tura hmalakna kan tih hian mipa chunga lénga mipate hnuaichhiah tur tihna a ni lo tih erawh hriat reng a pawimawh. Hmasawn tura ṭan lak zel erawh a ṭul em em a ni," a ti.

Training hi State Institute of Rural Development & Panchayati Raj (SIRDPR), Mizoram leh National Commission for Women, New Delhi-te buatsaih niin, ni thum a awh dawn a; local council member hmeichhia 43 telin, mithiamte'n thil pawimawh an zirtir a ni.