State lian zawk leibá leh Mizoram leibá tehkhin chi a ni lo - ZPM Ṭhalai

ZPM Ṭhalai chuan thuchhuah siamin, sum enkawl kawngah Finance changtu chief minister Zoramthanga chu hlawhchhamah an puh a, state lian zawk leibá leh Mizoram leibá tehkhin chi a ni lo tih an tarlang.

Assembly budget session neih mekah CM Zoramthanga'n zawhna ziaka a chhannaah, Mizoram sorkar leiba neih zat chu kum 2020-21-ah cheng vbc. 9,881.09 a nih thu leh leiba chu financial management thiam loh vang a ni lo tih a tarlan thu sawiin ZPM ṭhalaite chuan, "Mizoram leiba leh state lian, thawh chhuah ngah tak takte leiba nena tehkhin hian sum enkawl kawnga a hlawhchhamzia a inpuang ni berin kan hria. State hausate leibat leh keini state pachhe tak leibat chu tekhin chi-ah kan ngai lo a, Pu Zoramthanga hian Finance hi mi dang thiam zawkte kian turin kan phût," an ti.

ZPM Ṭhalai chuan, "Pu Zoramthanga'n sorkar hnathawk hlawh a hun taka pek theih loh chu sorkar mualphona a nih loh thu a sawi phei kha chu, sorkar hnathawkte thamlohna lian takah kan ngai," an ti a; hripui lên laia an hlawhte pûktir a, nasa taka sorkar mualpho tur vengtu sorkar hnathawkte chu MNF sorkarin a hmusit hlea an hriat thu an sawi.

MNF sorkarin Mizoram budget aṭanga SEDP a kalpui chu an sorkar hmaa Zoramthanga thusawi nen a inperhsan hle nia sawiin ZPM Ṭhalai chuan, "Tuna kan kal danah chuan SEDP atana an pek tam poh leh thil dang atana hna thawhna tur chu a heu mai dawna a lan avangin, SEDP sem tur hi khurpui kang chat thei loa mi thála sem turin kan phût a ni," an ti.