World Glaucoma Week 2022 hmang

Siaha District Hospital-a Eye OPD-ah nimin khan chief medical officer (CMO) Dr Lalnunziri kaihhruaiin World Glaucoma Week 2022 hman a ni a, thupui chu 'The World is bright, save your sight' tih a ni.

CMO Dr Lalnunziri chuan, mit enkawlnaa kum 2021-22 chhunga Siaha District Hospital hmalakna a tarlang a; kum 2020-2022 chhungin mi 22-te mit naute pâw (cataract) zai a ni a, zirlai naupangte an sikulah kal chilhin naupang 786 mit enfiah a ni. Kum upa lam leh khawsak harsa zualte hnenah a thlâwnin tarmit 839 sem a ni bawk.

Eye specialist Dr Lalṭanpuia chuan, Glaucoma chu mit thahrui (nerve) ro natna a ni a, enkawl dam theih a nih loh rualin, a zual zel tur ven theih a nih thu a sawi a; "Kan ramah hian doctor ráwn loa mit thlawr damdawi Betnesol mahni thua hmang ve mai ṭhin an tam a, hei hian mit BP (blood pressure) kan tih mai hi a tisang thei a, chu chuan nerve a tiro thei a ni," a ti a, doctor ráwn loa mit thlawr damdawi hmang lo turin mi tin a chah.

Glaucoma lan chhuah dan
• Lu leh mit na ngut ngut
• Chhimbâl rawngin êng (light)-a hual ṭhin
• Mit sír lama thil hmu lo
• Mit khua hmu lo thut thut