Health Care Scheme-ah mi 23,031-te MR bill cheng nuai 5,963.40 a táng

Health minister Dr R Lalthangliana chuan March 8, Thawhlehni khan Assembly session-ah zawhna ziaka chhangin, Health Care Scheme hnuaiah Mizoram sorkarin February 14, 2022 thlengin Rs 59,63,40,278 a bat thu leh bill batsakte chu mi 23,031 an nih thu a tarlang.

Health care bill rei tak tak sorkarin a bat chhan INC member Zodintluanga Ralte zawhna chhangin Dr R Lalthangliana chuan, "Bill pek chhuahna tur sum indaih loh vang a ni," a ti a; rang zawka bill pek theih a nih dawn leh dawn loh zawhna chhangin, "Tun dinhmunah chuan health care bill-te rang zawka pek a harsa," a ti.

Health Minister chuan ZPM member Lalduhoma zawhna ziaka chhangin, SEDP aṭangin Mizoram State Health Care Society (MSHCS) tan kum 2020-21 khan cheng nuai 1,234.25 leh kum 2021-22 chhungin cheng nuai 2,234.25 dah a nih thu a tarlang.

Dr R Lalthangliana chuan, MSHCS-a medical bill thehlut tawh, February 14, 2022 thlenga la pek loh zat chu mi 23,031 an ni tih tarlangin, "Heng mite hi bill pek tur sum indaih loh vanga la pek lohte an ni," a ti a; April 2022 - March 2023 chhunga Health Care Scheme kalpui leh turah chhungkaw khat tan Rs 2,00,000 thleng bill theih a nih dawn thu a tarlang bawk.