KHAWTHLIR

BCM Assembly
Baptist Church of Mizoram (BCM) rorelna sang ber, Assembly 2022 chu vawiin hian BCM Gilgal biak-in, Theiriatah ṭan a ni dawn a, March 13-ah a ṭiak ang. Covid-19 léng avangin tun ṭum BCM Assembly-ah hian zan lamah inkhawm a awm dawn lo a, chhûn lamah rorel a ni ang. Pathianni khian chawhma inkhawmah pastor nemnghehna inkhawm a awm dawn a ni.

Thisen pe
Pachhunga University College NSS unit chuan nimin khan an college campus-ah thisen pek an huaihawt leh a, mipa 98 leh hmeichhia 52-te'n Civil Hospital, Aizawl tan thisen unit 150 an pe; March 7, Thawhṭanni khan unit 76 an lo pe tawh bawk. Nimin vek khan BTS Army chuan Civil Hospital, Aizawl blood bank-ah thisen unit 14 an pe a, petute hmeichhia 11 leh mipa pathum an ni. Kolasib Diakkawn Branch YMA member-te pawhin March 8 khan District Hospital-ah thisen unit kua an pe bawk.

RBI sum pûk zat
Finance changtu chief minister Zoramthanga chuan INC member KT Rokhaw zawhna ziaka chhángin, December 16, 2018 aṭanga January 31, 2022 inkarah Mizoram sorkarin Reserve Bank of India (RBI) aṭangin normal ways and mean advance-in vawi 149 leh special drawing facility hmangin vawi 15 sum a pûk thu a tarlang.

Ṭanpuina hlân
ZPM Ṭhalai president Malsawmzuala Ralte, AMC councillor chuan nimin khan Dampa huam chhunga hripui la hluarna khuate a tlawh a, Reiek leh Chungtlang village task force hnenah India Formosa Foundation aṭanga hmuh hmai tuamna, hmai khuhna, kut tihfaina, hmun phuh faina leh pawisa a hlân.

Lirthei dah khap
Chaltlang Lily Veng (Bawngkawn-Sairang road)-a RC Tyre Works aṭanga tipper stand inkarah lung tohlâwt tla mai theia ngaih a awm avangin Aizawl District Disaster Management Authority chairman Dr Lalhriatzuali Ralte, Aizawl bawrhsap chuan mipui him zawk nan lung tohlâwt hnuaia lirthei dah a khap.